ترەمپ: گەمارۆكانمان ئێرانی كردووە بە دەوڵەتێكی مایەپووچبوو و شكستخواردوو

پەیام 

سەرۆكی ئەمریكا ڕایگەیاند، بەهۆی گەمارۆكانیانەوە ئێران بووە بە دەوڵەتێكی "مایەپووچبوو" و "شكستخواردوو".

دۆناڵد ترەمپ، سەرۆكی ئەمریكا دوێنێ جارێكی دیكە كۆنترۆڵكردنی تەواوەتیی وڵاتەكەی بەسەر گەرووی ستراتیژیی هورموزدا دووپات كردەوە و ڕایگەیاند: سەرجەم بارە نەوتییە پێویستەكان بەو ڕێڕەوە ئاوییەدا تێپەڕ دەبن. 

هاوكات ترەمپ ئاماژەی بەوە كرد، كە ئێران ڕووبەڕووی گەمارۆیەكی دەریایی خنكێنەر بووەتەوە كە گەنجینەكانی بەتاڵ كردووە و كردوویەتییە دەوڵەتێكی "ئیفلاسبوو و شكستخواردوو".

لە لێدوانە نوێیەكانیدا، سەرۆكی ئەمریكا باسی لەوەش كرد واشنتن توانای هەیە لە ماوەیەكی زۆر كورتدا ململانێی تاران یەكلا بكاتەوە. 

ناوبراو ڕوونی كردەوە كە تاران بەهۆی وەستانی هەناردەی نەوت، هەڵاوسانی بەرز و گوشارە ئابوورییە توندەكانەوە لە ڕووی داراییەوە تووشی داڕمان بووە و دەسەڵاتی ئەو وڵاتە كەوتووەتە نێو تەنگژەیەكی بێوێنەوە.

سەرۆكی ئەمریكا ڕایشیگەیاند: ئێمە بڕێكی زۆری نەوت لە گەرووی هورموزەوە دەردەكەین و بازاڕەكان دەپارێزن.