1 کاتژمێر پێش ئێستا
543 جار خوێنراوەتەوە
بۆ تاوتوێکردنى چەند پرسێک، چوارچێوەی هەماهەنگی كۆدەبێتەوە
پەیام
چوارچێوەی هەماهەنگی كۆ دەبێتەوە و پرسی دانیشتنی ئەنجوومەنی نوێنەرانی عێراق بۆ هەڵبژاردنی سەرۆككۆمار و قەیرانی پاڵێوراوی سەرۆكوەزیران تاوتوێ دەكات.
بڕیارە ئەمشەو سەركردەی لایەنەكانی چوارچێوەی هەماهەنگی لە ماڵی نووری مالیكی سەرۆكی هاوپەیمانیی دەوڵەتی یاسا كۆ ببنەوە. بەپێی زانیارییەكانیش لە كۆبوونەوەكەدا پرسی دانیشتنی سبەی یەكشەممەی ئەنجوومەنی نوێنەران بۆ هەڵبژاردنی سەرۆككۆمار تاوتوێ دەكرێت، بەو هۆیەشەوە نوێنەرانی یەكێتی و پارتی لە كۆبوونەوەكەدا بەشدار دەبن.
هەرچەندە ڕاگەیەنراو و زانیاری فەڕمی نییە، بەڵام زانیاری نافەڕمیی هەیە كە بەشێكی دیكەی كۆبوونەوەكەی چوارچێوەی هەماهەنگی بۆ گفتوگۆی پرسی پاڵێوراوی پۆستی سەرۆكوەزیرانە كە وەك گەورەترین كوتلە ئەو پۆستە مافی چوارچێوەی هەماهەنگییە.
هەر ەندە ڕۆژی شەممەی هەفتەی ڕابردوو چوارچێوەی هەماهەنگی بە زۆرینەی دەنگ نووری مالیكی وەك پاڵێوراو بۆ پۆستەكە دیاریی كرد، بەڵام ڕەتكردنەوەكەی دۆناڵد ترەمپ سەرۆكی ئەمریكا كێشەی بۆ هەنگاوەكەی لایەنە شیعییەكان دروستكردووە و كۆبوونەوەكەی ئەمڕۆ بە ئامانجی یەكلاكردنەوەی ئەو پرسەیە.
كۆبوونەوەكەی چوارچێوەی هەماهەنگی لەكاتێكدایە دوێنێ، هەینی، نووری مالیكی پاڵێوراوی سەرۆكوەزیران لەگەڵ جوشوا هاریس كارهەڵسوڕێنەری ئەمریكا لە عێراق كۆبووەوە، بەپێی ڕاگەیەنراوێكی فەڕمییش لە كۆبوونەوەكەدا باس لە گفتوگۆی لایەنەكان لەبارەی پێكهێنانی سەرۆكایەتییەكانی كۆمار و ئەنجوومەنی وەزیران و تێڕوانینی چوارچێوەی هەماهەنگی بۆ ڕەوتی كاری حكومەتی داهاتوو كرا.
لە تۆڕە کۆمەڵایەتیەکان شەیری بکە