ئەمریكا و ئێران لە توركیا كۆدەبنەوە و گەڕێكی دیكەی دانوستان دەستپێدەكاتەوە

پەیام 

سەرچاوە دبلۆماسییەكانی ئێران ئاشكرای دەكەن، لە چەند رۆژی داهاتوودا دانوستانی نێوان وڵاتەكەیان و ئەمریكا دەستپێدەكاتەوە.

ئاژانسی ئیسنای ئێرانی لە زاری چەند سەرچاوەیەكی دبلۆماسییەوە گواستوویەتییەوە، چاوەڕێ دەكرێت لە رۆژانی داهاتوودا دانوستانی نێوان تاران و واشنتۆن بە سەرۆكایەتیی عەباس عەراقچی، وەزیری دەرەوەی ئێران و ستیڤ ویتكۆف، نێردەی تایبەتی ئەمریكا بۆ ڕۆژهەڵاتی ناوەڕاست بەڕێوە بچێـت.

بەپێی ئەو سەرچاوانە، كۆبوونەوەی گفتوگۆكان لە ئەنقەرەی پایتەختی توركیا ساز دەكرێن، پێشبینیش دەكرێت هاكان فیدان، وەزیری دەرەوەی توركیا لە كۆبوونەوەكاندا بەشدار بێت.

ماڵپەڕی ئەكسیۆسی ئەمریكی باسی لەوە كردووە ئەگەری هەیە رۆژی هەینیی داهاتوو شاندەكانی دانوستان كۆ ببنەوە.

هەروەها ئاژانسی ئەسۆشیتید پرێس لە زاری چەند بەرپرسێكی توركەوە گواستوویەتیەوە، ئامانجی ئەنقەرە لە ڕێكخستنی ئەم دیدارانە ئەوەیە ئەگەری بژاردەی سەربازی دژی ئێران لەلایەن ئەمریكاوە كەم بكاتەوە.

هاوكات چەند سەرچاوەیەك باسیان لەوە كردووە چەند وڵاتێكی هەرێمیی دیكە لەنێوانیاندا میسڕ و قەتەر هەوڵیان داوە وەك نێوەندگیر پێشوازی لە دانوستانەكاندا بكەن و كاریان بۆ ڕێكخستنی كۆبوونەوە كردووە.