واشنتۆن ڤیزا و مافی مانەوە لە بەرپرسانی باڵای ئێران دەسێنێتەوە

پەیام  

وەزارەتی دەرەوەی ئەمریكا ڕایگەیاند، ڕێگە نادەن بەرپرسانی كۆماری ئیسلامی و كەسوكاریان سوود لە سیستەمی كۆچبەری وەربگرن و ماركۆ ڕووبیۆ بڕیاری هەڵوەشاندنەوەی مافی مانەوەی ئەو كەسانەی واژۆ كرد.

هەژماری فارسی وەزارەتی دەرەوەی ئەمریكا لە تۆڕی كۆمەڵایەتی "ئێكس" لە زاری مۆرا نامدار، یاریدەدەری وەزیری دەرەوەی ویلایەتە یەكگرتووەكانی ئەمریكا بۆ كاروباری كۆنسوڵی بڵاوی كردەووەتەوە: "ویلایەتە یەكگرتووەكان لەگەڵ گەلی ئێراندایە، ڕێگە نادەین ئەندامانی ڕژێمی ئێران و خزمە نزیكەكانیان، سوود لە سیستەمی ڤیزای ئەمریكا وەربگرن."

نامدار هۆگاری بڕیارەكەی ئەمركیای بۆ ئەوە گەڕاندەوە كە دەسەلاتدارانی داواكاری گەلەكەیان بۆ مافە سەرەتاییەكان سەركوت دەكەن.

ئەم لێدوانە دوای ئەوە دێت، كە ماركۆ ڕووبیۆ، وەزیری دەرەوەی ئەمریكا بڕیاری دا ئیمتیازاتی مانەوەی بەرپرسانی باڵای ئێران و ئەندامانی خێزانەكانیان لە ناو خاكی ئەمریكا هەڵبوەشێنێتەوە و لە بەیاننامەیەكی كورتدا ئاماژەی بەوە دا، "ئەوانەی لە سەركوتكارییە توندوتیژەكانی حكومەتی ئێران سوودمەند دەبن، ڕێگەیان پێنادرێت سوود لە سیستەمی كۆچبەری ئەمریكا وەربگرن."

تا ئێستا وردەكاری زیاتر سەبارەت بەم بڕیارە بڵاو نەكراوەتەوە و ڕوون نییە كە ئایا تەنها هەڵوەشاندنەوەی ڤیزاكان دەگرێتەوە، یان مافەكانی وەك نیشتەجێبوونی هەمیشەیی (گرین كارت) و ڕەگەزنامەی ئەمریكیش دەگرێتەوە.