ئه‌مریكا كه‌شتییه‌ بازرگانییه‌كان ئاگادار ده‌كاته‌وه‌ له‌وه‌ی له‌ ئێران نزیك نه‌بنه‌وه‌

دوای ئەوەی کەشتییەکی ئەمریکی لەلایەن سوپای پاسدارانەوە ڕووبەڕووی تەنگ پێ هەڵچنین بووەوە، ئەمریکا هۆشداری دەداتە کەشتییە بازرگانییەکانی کە لەکاتی تێپەڕین بە گەرووی هورمزدا لە سنوورە ئاوییەکانی ئێران نزیک نەبنەوە.

وەزارەتی گواستنەوەی ئەمریکا لە ئاگادارییەکدا داوای لەو کەشتییانە کردووە کە ئاڵای وڵاتەکەیان هەڵگرتووە، تا دەکرێت مەودا لەگەڵ ئاوەکانی ئێران بپارێزن، ئەمەش دوای ڕووداوەکەی سێی شوبات دێت کە تێیدا بەلەمەکانی سوپای پاسداران تەنگی بە کەشتییەکی نەوتهەڵگری ئەمریکی بەناوی "ستێنا ئیمپێراتیڤ" هەڵچنی. 
لەلایەکی دیکەوە فەرماندەیی ناوەندیی سوپای ئەمریکا (سێنتکۆم) ڕێنمایی داوەتە کەشتییەکان کە لەکاتی ڕۆیشتن بەرەو ڕۆژهەڵاتی گەرووەکە، نزیکبن لە ئاوەکانی عومان بۆ پاراستنی سەلامەتییان. 
ئەم هۆشدارییە نوێیە لە کاتێکدایە کە گەرووی هورمز شادەمارێکی سەرەکیی گواستنەوەی نەوتە بۆ بازاڕەکانی جیهان و بەهۆی گرژییە سیاسییەکانەوە تاران چەندین جار هەڕەشەی داخستنی کردووە، هەروەها هێزە دەریاییەکانی ئێران مێژوویەکیان هەیە لە بەکارهێنانی بەلەمی بچووک و کۆپتەر بۆ ناچارکردنی کەشتییە بازرگانییەکان تا بچنە ناو ئاوە هەرێمییەکانی ئێرانەوە و دەستیان بەسەردا بگرێت.