ترەمپ: ئێران بۆ ڕێككەوتنێكی ‏نوێ ئامادە نەبێت هەموو شتێك لەدەستدەدات

پەیام
 
سەرۆكی ئەمریكا، هۆشدارییەكی توند ئاراستەی كۆماری ئیسلامی ئێران دەكات و ڕایدەگەیەنێت: پێش ئەوەی كاتەكە بەسەربچێت، دەبێت تاران ڕێككەوتنێك واژوو بكات، ئەگەر نا  هەموو شتێك لەدەستدەدات.

دۆناڵد ترامپ سەرۆكی ئەمریكا، لە لێدوانێكی ڕۆژنامەوانیدا ڕایگەیاند: گەورەترین پرد لە ئێراندا ڕووخاوە و هەرگیز جارێكی دیكە ‏بەكارناهێنرێتەوە، جەختیشی كردەوە، هێرشی زیاتر لە ڕێگادایە، ئەوەش وەك ئاماژەیەك بۆ ئەو هێرشە بەرفراوانانەی ‏لە ڕۆژانی ڕابردوودا ژێرخانی ستراتیژیی قووڵایی خاكی ئێرانیان كردووەتە ئامانج و زیانی گەورەیان بە دامەزراوەكان گەیاندووە.

سەرۆكی ئەمریكا داوای لە ئێرانیش كرد پێش ئەوەی وڵاتەكەیان هەموو شتێك لەدەست بدات، بۆ ڕێككەوتنێكی ‏نوێ بێنە سەر مێزی گفتوگۆ.

جێی ئاماژەیە ئەم هەفتەیە بە گەرمترین و مەترسیدارترین هەفتە دادەنرێت، چونكە ئێران ڕووبەڕووی شەپۆلێكی بێوێنەی هێرش بۆ سەر بنكە ‏سەربازییەكان و ڕێگاوبانەكان بووەتەوە.