مەڵبەندی هەڵەبجەی كۆمەڵ داوای سزادانی ئەو كۆمپانیایانە دەكات لە كیمیاییباران تێوەگلاون

پەیام

لە ساڵیادی كیمیابارانكردنی هەڵەبجەدا، مەڵبەندی هەڵەبجەی كۆمەڵی دادگەریی كوردستان داوا دەكات هەڵەبجە لە ململانێی حزبی ڕزگار بكرێت و ڕایدەگەیەنێت: پێویستە هەموو ئەو كۆمپانیایانەی لە تاوانەكە تێوەگلاون، سزا بدرێن.

ئەمەی خوارەوە دەقی ڕاگەیەنراوی مەڵبەندی هەڵەبجەی كۆمەڵە لە 38 هەمین ساڵیادی كیمیابارانكردنی هەڵەبجەدا:
بسم الله الرحمن الرحیم

?ۆڵا تَحْسَبَنَّ اللَّهَ غَافِلًا عَمَّا ێعْمَلُ الڤَّالِمُونَ إِنَّمَا یُۆَخِّرُهُمْ لِێوْمٍ تَشْخَصُ فِیهِ الْأَبْصَارُ?

جەماوەری ستەمدیدەی كوردستان، مرۆڤدۆستانی جیهان...

لە كاتێكدا ساڵڕۆژی كارەساتی هەڵەبجە دەكەینەوە، هێشتا"نەبوو ساڕێژ برینی كۆن، كەچی باری غەمێكی تر"نیشتۆتە سەر شانی ئەم شارە.

ئەمڕۆ جیهان و ناوچەكە لەناو ئاگر و ململانێیەكی توندایە و دەرگاكانی ئارامی و بژێوییان لێ هەڵچنیوین، ئێمە لەم یادە پڕ لە سوێیەدا ڕایدەگەیەنین: یەك.

هاوارێك بۆ ویژدانی جیهانی: داوا دەكەین هەموو لایەك سەیرێكی هەڵەبجە بكەن و ئەم شەڕە داسەپاوە ڕابگرن، با چیتر مرۆڤایەتی وەك ئێمە نەبێتە قوربانی چەكی كۆكوژ.

لە خوای گەورە داواكارین لەم گێژاوەدا گەلەكەمان بپارێزێت و جارێكی تر تاوانێكی وەك هەڵەبجە دروست نەبێتەوە.
دوو.
زیندووهێشتنەوەی كەیسی هەڵەبجە: ئێمە وەك ئەركێكی ئاینی و ئەخلاقی و نەتەوەیی، كەیسی هەڵەبجە بەرامبەر هەرێم و عێراق و جیهان بە زیندوویی دەهێڵینەوە.

ئەم كەیسە تەنها یادەوەری نییە، بەڵكو دۆسیەیەكی یاسایی و مرۆیی كراوەیە تا ئەو كاتەی هەموو مافەكان بەدەست دێن و تاوانباران و كۆمپانیا هاوكارەكان سزای دادپەروەرانەی خۆیان وەردەگرن.
سێ.
ئەركی حكومەتی فیدراڵ و هەرێم: پێویستە هەڵەبجە لە ململانێی حیزبی و فەرامۆشكردن ڕزگار بكرێت.

جەخت دەكەینەوە كە پێویستە بڕیاری پارێزگابوون بە كردەیی لە بودجە و دامەزراوەكاندا ڕەنگ بداتەوە و ئاوەدانكردنەوەی شارەكە و خزمەتكردنی بەركەوتەكان بكرێتە ئەولەویەت، نەك تەنها لە یادی 16 / سێدا باس بكرێن.

لە كۆتاییدا: هیوای سەلامەتی بۆ هەمووان دەخوازین و نزا دەكەین خوای میهرەبان ئەم نیشتیمانە لە شەڕ و ماڵوێرانی بپارێزێت.

درود بۆ گیانی پاكی شەهیدانی هەڵەبجە و سەرجەم شەهیدانی ڕێگای ڕاستی.
مەڵبەندی هەڵەبجەی
كۆمەڵی دادگەریی كوردستان
16 / سێ / 2026