هێرشی سەر بنكەکانى ئێران لە ڕۆژهەڵاتی كوردستان دەیان کوژراوى خستووەتەوە

پەیام 

دوا نیوەڕۆی ئەمڕۆ، لە ئەنجامی هێرشێكی بەرفراوانی فڕۆكە جەنگییەكانی ئەمریكا و ئیسرائیل بۆ سەر چەندین ناوەندی سەربازی و هەواڵگریی كۆماری ئیسلامیی ئێران لە شارەكانی ڕۆژهەڵاتی كوردستان، دەیان كەس كوژراون كە بەشێكیان خەڵكی مەدەنین.

 لەم هێرشانەدا بنكەی سوپا لە گوندی میرەدێ و دوو بنكەی پاسەوانیی سنوور لە سەرشیوی سەقز بە تەواوەتی خاپوور كران، هاوكات بنكەی سوپای پاسداران لە گوندی دزڵی سەربە سەوڵاوا كرایە ئامانج، كە بەهۆیەوە لانیكەم ١٥ ئەندامی سوپا و هاووڵاتییەكی مەدەنی كوژران. 

جگە لەمانەش، بارەگای فەرماندەیی سنوورپارێزیی پارێزگای سنە لە گەڕەكی ئیسلامئاوا بە چڕی بۆردومان كرا، كە نزیك بە ئاوەدانییە، بەهۆیەوە جگە لە كوژرانی ژمارەیەك سەربازی ئێران چەندین هاووڵاتی كوردیش گیانیان لەدەستدا.

لەلایەكی دیكەوە، بنكەی سوپای پاسداران و چەند شوێنێی دیكە لە مەروان بۆردومان كران پاش بۆردومانەكان سەرجەم بەندكراوانی بەندیخانەی ناوەندیی مەریوان ئازاد كراون.

لە بەرانبەردا ئیتڵاعاتی ئێران كورتەنامەی بەكۆمەڵی بۆ هاووڵاتییان ناردووە  داوا لە خەڵك كراوە زانیاری لەسەر هەر جۆرە جووڵەیەكی سەربازی و گواستنەوەیەكی چەك و تەقەمەنی پێان ڕابگەیەنن.