لە هێرشەکانى سەر لوبنان سەركردەیەكی حزبوللا و 180 كەسى دیکە بوونە قوربانی

پەیام 

قەوارەی زایۆنی سەرۆكی فراكسیۆنی حزبوڵڵای لوبنانی تیرۆر كرد، لە بۆردومانەكانیشدا 180 كەس بوونە قوربانی. 

كەناڵی 12ی عیبری ڕایگەیاند، لەو هێرشانەی ئەمڕۆ دووشەممە كرایە سەر لوبنان، "محەمەد ڕەعد"، سەرۆكی فراكسیۆنی حزبوڵڵا لە پەرلەمانی لوبنان كوژراوە، كە دەنگۆی ئەوە هەبوو بكرێتە جێگری ئەمینداری گشتیی حزبەكە.

هاوكات سوپای داگیركەر دەستپێكردنی شەپۆلێكی نوێی هێرشی بۆ سەر كۆگاكانی چەك و ژێرخانی حزبوڵڵا لە بەیروت و باشووری لوبنان ڕاگەیاند. وەزارەتی تەندروستیی لوبنانیش ئاشكرای كرد، تا ئێستا 31 كەس كوژراون و 149 كەسی دیكەش بریندارن.

لە وەڵامدا، حزبوڵڵای لوبنانی بەرەبەیانی ئەمڕۆ بە مووشەك و فڕۆكەی بێفڕۆكەوان، پێگەیەكێ بەرگریی مووشەكیی قەوارەی زایۆنی لە باشووری حەیفا كردە ئامانج و زەنگی مەترسی لە باكووری قەوارەكە لێی دا.

هێرشەكانی داگیركەر تەنها بۆ سەر ژێرخانی سەربازی نەبووە، بەڵكو ئۆتۆمبێلێكیان لە ناوچەی "كەفر دەجال" كردووەتە ئامانج كە دوو ئەندامی هێزی "ڕیزوان"ـی تێدا بووە. میدیاكانیش دەڵێن: دانیشتووانی 53 گوند لە باشووری لوبنان دوای هۆشداریی سوپای داگیركەر، دەستیان بە چۆڵكردنی ماڵەكانیان كردووە و ئاوارە بوون.