1 کاتژمێر پێش ئێستا
160 جار خوێنراوەتەوە
هێرش بۆ سەر فڕۆكەخانەی هەولێر بەردەوامە و چەند درۆنێکى دیكە خرانە خوارەوە
پەیام
هێرش بۆ سەر فڕۆكەخانەی نێودەوڵەتیی هەولێر بەردەوامە و بنكەیەكی وەزارەتی پێشمەرگەش لە دێگەڵە كرایە ئامانج.
ماوەی دوو ڕۆژە، ماوە ماوە، بە درۆن هێرش دەكرێتە سەر كونسوڵخانەی ئەمریكا لە شاری هەولێر و فڕۆكەخانەی نێودەوڵەتیی هەولێر كە بنكەی هێزەكانی هاوپەیمانانی تێدایە.
لە دوێنێ شەویشەوە هێرشەكان چڕ بوونەتەوە و بەردەوام دەنگی تەقینەوە و بەرپەرچدانەوەی هێرشەكان دێن لەلایەن سیستەمی بەرگریی ئاسمانیی فڕۆكەخانە و كونسوڵخانەوە.
پەیامنێری پەیام ڕایگەیاند: پێشنیوەڕۆی ئەمڕۆ جارێكی دیكە هێرشی درۆنی كرایە سەر هەولێر و لەلایەن بەرگریی ئاسمانییەوە تێكشكێنرا و درۆنەكە خرایە خوارەوە.
بەپێی زانیارییەكان بەهۆی خستنەخوارەوەی درۆنەكانەوە چەند ئۆتۆمبێلێك لە كۆمەڵگەی "پیرزین"ی هەولێر زیانیان بەركەوتووە.
دوێنێ شەویش وەزارەتی پێشمەرگەی هەرێم ڕایگەیاند: ئێوارەی ڕۆژی یەكشەممە 1ی ئادار، بارەگای فیرقەی 11 ی هێزی پێشمەرگەی كوردستان لە ناحیەی دێگەڵە بە درۆنێكی بۆمبڕێژكراو پەلامار دراوە.
وەزارەتی پێشمەرگە ڕاشیگەیاندووە: داوا لە بەڕێز سوودانی، سەرۆكی حكومەتی عێراق و فەرماندەیی گشتیی هێزە چەكدارەكان دەكەین سنوورێك بۆ ئەم دەستدرێژی و كردە دوور لە یاساییانە دابنێت و بەرپرسارانی ئەم كردەوەیە ڕووبەڕووی لێپێچینەوەی یاسایی بكات. جەختیشی كردەوە: بەردەوامیدان بەم كردەوە تیرۆریستیانە بێ وەڵام نابێت.
لە تۆڕە کۆمەڵایەتیەکان شەیری بکە