شاندێکی هاوبەشی هەڵوێست و کۆمەڵ لەگەڵ سوودانی پرسی مووچە و ئاڵنگارییە ئەمنییەکان تاوتوێ دەکەن

شاندێکی هاوبەشی فراکسیۆنەکانی هەڵوێست و کۆمەڵ لە بەغدا لەگەڵ سەرۆکوەزیرانی عێراق کۆبوونەوە؛ تێیدا جەختیان لە پاراستنی شایستە داراییەکانی هەرێم و دوورخستنەوەی وڵات لە جەنگی سوپای زایۆنی و ململانێ هەرێمییەکان کردەوە.

ئەمڕۆ پێنجشەممە، شاندێکی هاوبەش لە فراکسیۆنەکانی (هەڵوێست و کۆمەڵ) لە شاری بەغدا لەگەڵ محەمەد شیاع سوودانی، سەرۆکوەزیرانی عێراق کۆبوونەوە. لە دیدارەکەدا بە وردی تیشک خرایە سەر دۆخی سیاسی و ئابووری عێراق و هەنگاوەکانی چارەسەرکردنی ئەو تەنگژانەی روو لە وڵات دەکەن، بە ئامانجی سەقامگیرکردنی پەیوەندییەکانی نێوان ناوەند و هەرێم و دابینکردنی بژێوی هاوڵاتیان.

لە تەوەرێکی دیکەی کۆبوونەوەکەدا، شاندە کوردییەکان جەختیان لە پێویستی پاراستنی سەروەری عێراق کردەوە، بە تایبەت لە سایەی هەڕەشە بەردەوامەکانی سوپای زایۆنی لە ناوچەکەدا. هەردوولا هاوڕابوون لەسەر ئەوەی کە دەبێت عێراق لە ململانێ سەربازییەکان بەدوور بگیرێت و کار بۆ بەهێزکردنی ژێرخانی ئابووری و پاراستنی بەرژەوەندییە باڵاکانی وڵات بکرێت لەبەردەم هەر ئەگەرێکی نەخوازراودا.

سەبارەت بە بژێوی خەڵکی کوردستان، شاندەکان داوایەکی ڕوونیان ئاراستەی سەرۆکوەزیران کرد بۆ زامنکردنی شایستە داراییەکان و ناردنی مووچە لە کاتی خۆیدا. داواکارییەکە تەنها مووچەی فەرمانبەرانی نەدەگرتەوە، بەڵکو جەخت لە خەرجکردنی پارەی گەنمی جوتیاران، دابینکردنی دەرمان و سەرجەم ئیستحقاقاتە فیدراڵییەکان کرایەوە وەک مافێکی دەستووری کە نابێت بکرێتە قوربانی کێشە سیاسییەکان.

لەلایەن خۆیەوە، محەمەد شیاع سوودانی، سەرۆکوەزیرانی عێراق ئاماژەی بە بوونی کۆمەڵێک ئاڵنگاری گەورە کرد کە لە ئێستادا رووبەڕووی عێراق بوونەتەوە. سەبارەت بە پرسی دارایی هەرێم، سوودانی دڵنیایی بە شاندەکە دا و رایگەیاند کە حکومەت پابەندە بە خەرجکردنی شایستەکان، بەڵام جەختی کردەوە کە بەردەوامی پرۆسەی ناردنی مووچە پێویستی بە جێبەجێکردنی وردی یاسا کارپێکراوەکان و ڕێککەوتنە نێوانخۆییەکان هەیە.