کەشناسێک: له‌ سێشه‌ممه‌وه‌ گه‌رمایه‌كی به‌تین ڕوو لە هه‌رێم دەکات

پەیام  

ئاراس جه‌بار شاره‌زای بواری كه‌شناسی رایده‌گه‌یه‌نێت، له‌ رۆژی سێشه‌ممه‌وه‌ گه‌رمایه‌كی به‌تین له‌ هه‌رێمی كوردستان ده‌ستپێده‌كات و لە گەرمیان دەگاتە 48 پلەى سیلیزى.

ئەو شاڕەزایەى بوارى کەشناسی ئه‌مڕۆ له‌ راگه‌یه‌ندراوێكدا بڵاویکردووەتەوە "لە رۆژی سێشەممه‌ 28ی 7ى 2026 گەرمایەکی تا رادەیەک بەتین لەناوچەکانمان دەستپێدەکات و ئەگەری هەیە بۆ ماوەی سێ رۆژ بەردەوام بێت".

ئەوەشى خستووەتەڕوو، بەرزترین پلەی گەرمی پێشبینیکراو لەماوەی ئەو گەرما بەتینەدا لە رۆژانی 28 و 29 و 30ی ئەم مانگە بەم شێوەیە دەبێت: سلێمانی 43 پلە، هەولێر 45 بۆ 46 پلە، دهۆک 43 بۆ 44 پلە، هەڵەبجە 44 بۆ 45 پلە، کەرکوک 46 بۆ 47 پلە، گەرمیان 47 بۆ 48 پلە، راپەرین 44 بۆ 45 پلە، سۆران 42 بۆ 43 پلە، زاخۆ 42 بۆ 43 پلە.