دژەتیرۆری كوردستان: پێنج درۆنی بۆمبڕێژكراوی دیکە لە هەولێر تێكشكێندران

پەیام

لە ئاسمانی هەولێر 5 درۆنی بۆمبڕێژكراوی دیكە تێكشكێندران و زیانەكانیش تەنیا ماددی بوون.

دژەتیرۆری كوردستان ڕایگەیاند، ئەمڕۆ هەینی 24ی تەممووزی 2026، لە نێوان كاتژمێر 9:32 خولەك تا 9:45 خولەكی پێش نیوەڕۆ، 5 درۆنی بۆمبڕێژكراو لە ئاسمانی هەولێر تێكشكێندران. 

درۆنەكان لە لایەنی ڕۆژئاوای پارێزگاكەوە ئاراستە كرابوون و لەلایەن هێزەكانی هاوپەیمانانەوە خرانە خوارەوە، بێ ئەوەی زیانی گیانییان لێ بكەوێتەوە.

بەپێی زانیارییەكان هێرشەكان بوونە هۆی كەوتنەوەی ئاگر لە پوش و پاوانی سنووری گوندی گەزنە، هاوكات ئەحمەد هۆشیار، بەڕێوەبەری فڕۆكەخانەی نێودەوڵەتیی هەولێریش جەختی كردەوە كە گەشتە ئاسمانییەكان نەوەستاون و دۆخەكە ئاساییە.

ئەمە لە كاتێكدایە، لە سەرەتای دەستپێكی گرژییەكانی ناوچەكە لە 28ی شوباتەوە، هەرێمی كوردستان ڕووبەڕووی زۆرتر لە 930 هێرشی درۆنی و مووشەكی بووەتەوە، كە تەنها هەولێر 600 هێرشی بەركەوتووە. بەپێی ئامارەكان، بەهۆی ئەو هێرشانەوە تا ئێستا 30 كەس گیانیان لەدەستداوە و نزیكەی 150 كەسی دیكەش بریندار بوون.