بەرپرسێكی ئێران: تەنیا تاران كاتی كۆتاییهاتنی جەنگ دیاری دەكات

پەیام

بەرپرسێكی ئێران ڕایدەگەیەنێت كە تەنیا تاران كاتی كۆتاییهاتنی جەنگەكە دیاری دەكات، هاوكات ئامادەیی تەواوی هێزەكانی بۆ ئۆپەراسیۆنی سەربازیی درێژخایەن دژی ئەمریكا و قەوارەی زایۆنی دووپات دەكاتەوە. 

تۆڕی (سی ئێن ئێن) لە زاری بەرپرسێكی باڵای ئەمنیی ئێرانەوە ئاشكرای كرد، پێشبینییەكانی ئەمریكا بۆ كورتخایەنیی جەنگەكە بەتەواوی هەڵە بوون. ڕاشیگەیاند: لێدوانەكانی وەزیری دەرەوەی ئەمریكا بۆ كۆتاییهاتنی ململانێكان لە چەند هەفتەیەكدا، قسەیەكی دوور لە ڕاستییە.  

بەرپرسە ئێرانییەكە ئاماژەی بەوە دا كە هەرگیز لە بەرگریكردن ناوەستن تاوەكو وانەیەكی مێژوویی بە ترەمپ و نەتەنیاهوو دەدەن. ڕاشیگەیاند: جبەخانەی مووشەكی و درۆنەكانمان بۆ ئۆپەراسیۆنی دوورمەودا ئامادەیە و بەردەوام سیستەمی بەرگریی ئاسمانی بە ئامێری نوێ بەهێز دەكەین. 

ئەمە لە كاتێكدایە، پێش كۆبوونەوەی وڵاتانی گرووپی حەوت  لە پاریسی پایتەختی فەرەنسا، ماركۆ ڕۆبیۆ، وەزیری دەرەوەی ئەمریكا ڕایگەیاند كە هێرشە سەربازییەكان تواناكانی ئێرانیان لاواز كردووە. ئەو دەڵێت، لە چەند هەفتەیەكدا تاران دەگاتە بێهێزترین قۆناغی خۆی لە مێژووی نوێدا.