ئەمریكا: سەردەمی هەڕەشە دەریاییەكانی ئێران لە ئاوە هەرێمییەكاندا كۆتایی هاتووە

پەیام

ئەمریكا كۆتاییهاتنی سەردەمی هەڕەشە دەریاییەكانی ئێرانی ڕاگەیاند و فەرەنسایش داوای پاراستنی گەرووی هورمز دەكات.

فەرماندەیی ناوەندیی ئەمریكا كۆتاییهاتنی هەڕەشە دەریاییەكانی ئێرانی ڕاگەیاند و فەرەنساش داوای پێكهێنانی هێزێكی نێودەوڵەتی بۆ پاراستنی گەرووی هورمز و تانكەرە نەوتەكان لە ناوچەكەدا دەكات.

فەرماندەیی ناوەندیی سوپای ئەمریكا (سێنتكۆم) ڕاگەیەندراوێكی بڵاو كردەوە و تێیدا جەختی كردەوە كە "سەردەمی هەڕەشەی كەشتییەكانی ئێران بۆ سەر كەشتیوانی جیهانی لە ئاوە هەرێمییەكاندا كۆتایی هاتووە". 

سێنتكۆم لە هەژماری فەرمی خۆی لە تۆڕی كۆمەڵایەتی "ئێكس"، گرتەیەكی ڤیدیۆیی بڵاو كردەوە كە تێیدا تێكشكاندنی چەندین بەلەمی سەربازیی ئێران پیشان دەدات كە پێشتر مەترسییان بۆ سەر هاتوچۆی دەریایی دروستكردبوو.
 
لەلایەكی دیكەوە، ژان نۆێل بارۆ، وەزیری دەرەوەی فەرەنسا، لە كۆنفرانسێكی ڕۆژنامەوانیدا دوای كۆبوونەوەی وەزیرانی دەرەوەی گرووپی حەوت، ستراتیژییەكی نوێی نێودەوڵەتی بۆ ڕووبەڕووبوونەوەی مەترسییەكانی ئێران لە ڕێڕەوە ئاوییەكان و بەتایبەتی گەرووی هورمز ئاشكرا كرد.

وەزیری دەرەوەی فەرەنسا جەختی لە پێویستی دەستپێكردنی "ئەركێكی نێودەوڵەتی" بەپەلە كردەوە بۆ دابینكردنی ئاسایشی گەرووی هورمز. 

ئاماژەی بەوەش دا كە لە قۆناغی دوای پێكدادانە سەربازییەكانی ئێستا، سیستمێكی "یاوەری سەربازی" بۆ بارهەڵگرە نەوتەكان پەیڕەو دەكرێت، تاوەكو ئازادیی كەشتیوانی و هاتوچۆی بازرگانی لە ناوچەكەدا بە تەواوی مسۆگەر بكرێت.