وه‌زاره‌تی پێشمه‌رگه‌: هاووڵاتیان و سه‌روه‌ریی خاكه‌كه‌مان هێڵی سوورن

شەوى ڕابردوو هێرشى درۆنى کرایە سەر ماڵێک لە سنوورى پارێزگاى هەولێر و، دوو هاوسەر لە شیرینیى خەودا شەهید کران. 
ئەو ماڵەى کرایە ئامانج، لە گوندى زەرگەزەویى سەر بە ناحیەى دارەشەکرانە. مووسا ئەنوەرى تەمەن ٣٩ ساڵ کە پێشمەرگەبوو، لەگەڵ مژدە ئەسعەدى ٣٥ ساڵى هاوسەرى، لە ڕووداوەکەدا بوونە قوربانى و، دوو منداڵیان ڕزگاریان بوو. 
دژەتیرۆرى پارتى لەبارەى ڕووداوەکەوە ڕایگەیاند، کاتژمێر ١٢: ١٥ خولەکى شەو ئەنجام دراوە و، درۆنە بۆمبڕێژکراوەکەش "لە ئێرانە ئاراستە کراوە". بەڵام ڕێکخراوى سى پى تى دەڵێت: بە دوو درۆن هێرش کراوەتە سەر گوندى زەرگەزەوى و، درۆنەکان لەلایەن گرووپە هاوپەیوەندەکانى ئێران لە عێراقەوە هەڵدرابوون. 
هەریەکە لە مەسروور بارزانى، سەرۆکى حکومەتى ماوەبەسەرچووى هەرێمى کوردستان و نێچیرڤان بارزانى، سەرۆکى هەرێمى کوردستان، ئیدانەى هێرشەکەیان کرد. 
مەسروور بارزانى دەڵێت "غەمگین و دڵگرانم بە هێرشەکە و بەئامانجگرتنى خەڵکى سڤیل و ماڵى هاووڵاتیان تاوانى جەنگە". دەشڵێت "داواى خەڵکى بێتاوانى کوردستان دەگەیەنینە هەموو جیهان". 
سەرۆکى هەرێمى کوردستانیش ڕایدەگەیەنێت: بە هیچ شێوەیەک ئەم هێرشانە قبووڵکراو نین و پێویستە حکومەتى عێراق ئەرکى خۆى بۆ ڕێگرى لە هێرشەکان جێبەجىَ بکات. 
هاوکات وەزیرى پێشمەرگە سەرکۆنەى هێرشەکە دەکات و، ڕایدەگەیەنێت "بەئامانجگرتنى خەڵکى سڤیل و پێشێلکردنى شکۆى خاکى هەرێم و عێراق، هەڕەشەیەکى ڕاستەوخۆیە بۆ سەر ئاسایشى ناوچەکە". شۆڕش ئیسماعیل دەشڵێت "دووپاتى دەکەینەوە گیانى هاووڵاتیان و سەروەریى خاکەکەمان هێڵى سوورە".