ئێران؛ داوا لە گەنجان دەکرێت وەک "قەڵغانی مرۆیی" دەوری وێستگەکانی کارەبا بگرن

پەیام
بەمەبەستی پاراستنیان لە هەڕەشەکانی ترەمپ، بەرپرسێکی باڵای ئێران داوا لە گەنجـان و توێژە جیاوازەکان دەکات، ئەمڕۆ سێشەممە "زنجیرەی مرۆیی" بە دەوری وێـستگەکانی کارەبای وڵاتەکەیان دروست بکەن و وەک سەرمایەیەکی نیشتمانی بیپارێزن. 

ڕەزا ڕەحیمی، ئەمینداری ئەنجومەنی باڵای لاوان و مێردمنداڵانی ئێران، لە پەیامێکی ڤیدیۆیی ڕاستەوخۆدا داوای لە سەرجەم گەنجانی وڵاتـەکەی کرد وەک هێڵێکی بەرگریی مرۆیی لە دەوری دامەزراوەکانی وزە کۆببنەوە. 

ڕەحیمی لە پەیامەکەیدا دەڵێت: "داوا لە وەرزشوانان، هونەرمەندان، قوتابیان و مامۆستایانی زانکۆ دەکەم کە ئەمڕۆ سێشەممە، کاتژمێر دووی پاشنیوەڕۆ، لە دەوری وێستگەکانی کارەبا ئامادەبن. " ئەو جەختی کردەوە کە ئەم وێستگانە سەرمایەی نیشتمانین و پاراستنیان ئەرکێکی لە پێشینەیە. 

 ئەمینداری ئەنجومەنی باڵای لاوان و مێردمنداڵانی ئێران ئاماژەی بەوە کردووە کە "ئەم دامەزراوانە، بەدەر لە هەر تێڕوانین و ئاراستەیەکی سیاسی، موڵکی داهاتووی ئێران و گەنجەکانین".