ئەکسیۆس: ئەمریکا و ئێران تەنها لەسەر "کاتیبوون"ـی ئاگربەست ناکۆکن

پەیام
بەپێى ماڵپەڕى ئەکسیۆس، تڕەمپ ئامادەیی نیشان دەدات پرۆسە سەربازییەکانی دژی ئێران دوابخات ئەگەر ئاسۆیەکی ڕوون بۆ ڕێککەوتن هەبێت، هاوکات کۆشکی سپی وەڵامە توندەکانی تاران تەنها بە مانۆڕێکی فشار بۆ سەر مێزی دانوستان دەبینێت. 

ماڵپەڕی "ئەکسیۆس" لە زاری سەرچاوەکانی بڵاویکردەوە، دۆناڵد تڕەمپ، سەرۆکی ئەمریکا، ئەگەر هەست بە بوونی دەرفەتێک بکات بۆ گەیشتن بە ڕێککەوتنێکی نوێ، ئەوا ئەگەری هەیە فەرمانی دواخستنی هەر کردەوەیەکی سەربازی دژی ئێران دەربکات. سەرچاوەکان ئاماژە بەوە دەدەن کە تڕەمپ نەرمی دەنوێنێت و ئامادەیە پێشوازی لە هەر ڕێککەوتنێک بکات کە بێتە ئاراوە، بەڵام هێشتا گومانەکان لەسەر ئەوە ماونەتەوە کە ئایا تاران بە ئامادەی هەنگاوێکی لەو شێوەیەیە یان نا. 

هەروەها ماڵپەڕى ئەکسیۆس ئەوەشى بڵاو کردوەتەوە، ئێران و ئەمریکا لەسەر زۆرینەى خاڵەکانى ئەو پلانە کۆکن کە پاکستان پێشکەشى هەردوولایەنى کردووە، بەڵام تەنها ئێران داواى ڕاگرتنی تەواوەتى جەنگ و دووبارە نەبوونەوەى دەکات، بەڵام ئەمریکا بەوە ڕازی نییە و داواى ئاگربەستی کاتى دەکات کە لە میانەیدا ڕێکەوتن لەسەر ڕاگرتنی جەنگ بکرێت.