چوار دانیشتنی پەرلەمانى عێراق لەم هەفتەیەدا بەڕێوەدەچێت

پەیام

لەم هەفتەیە چوار دانیشتنی ئەنجوومەنی نوێنەرانی عێراق بەڕێوە دەچێت و خوێندنەوە بۆ 11 پێشنیازەیاسا ئەنجام دەدات كە یەكێكیان سەربازیی زۆرەملێیە.

بە پێی ئەو كارنامانەی ئەنجوومەنی نوێنەرانی عێراق بڵاوی كردوونەتەوە "ڕۆژەكانی یەكشەممە، دووشەممە، چوارشەممە و پێنجشەممەی ئەم هەفتەیە دانیشتنی ژمارە 18 تا 21ی خۆی ئەنجام دەدات".

لە كارنامەكاندا هاتووە لە دانیشتی ژمارە 18ی یەكشەممەدا خوێندنەوەی یەكەم بۆ پێشنیازەیاسای خزمەتی ئاڵا، یان سەربازیی زۆرەملێ بە ئامادەبوونی لیژنەكانی ئاسایش و بەرگری و لیژنەی یاسایی، پێشنیازەیاسای هەمواری پێنجەمی یاسای ئەنجوومەنی شێرپەنجەی ساڵی 1985.

هەروەها ڕێكخستنی مافەكانی قوربانییانی ڕووداوگەلێكی ڕابردوو ئەنجام دەدات وەك قوربانییانی نەخۆشخانەی خەتیب، ڕووداوەكی حەمدانیە، قوربانیانی ناوەندی بەبازاڕكردنی كۆرنیش لە واست، 

ڕۆژی دووشەممەیش لە دانیشتنی ژمارە 19دا خوێندنەوەی یەكەم بۆ پێشنیازەیاساكانی ئەنجوومەنی نیشتمانی ئاو و یاسای نێوبژیوانی دەكات.

ڕۆژەكانی چوار شەممە و پێنجشەممەیش لە دانیشتنەكانی 20 و 21یدا، خوێندنەوەی یەكەم بۆ شەش پێشنیازەیاسا دەكات ئەوانیش: پێشنیازەیاسای (وەزارەتی گەیاندن، بەڕێوەبردنی پاشەڕۆ قورسەكان، پێشنیازەیاسای چاودێریی نەجەوانان، پێشنیازەیاسای هەمواری یەكەمی یاسای پاراستنی مامۆستایان و ڕێنماییكارە پەروەردەییەكانی ساڵی 2018).