عێراق.. هه‌وڵ بۆ جێبه‌جێ كردنی یاسای خزمەتی سەربازی ده‌درێت

پەیام

دوای ڕاوێژکردن لەگەڵ سەرۆکی کوتلە پەرلەمانییەکان سەرۆکی ئەنجومەنی نوێنەرانی عێراق، پێشنیازی یاسای خزمەتی سەربازیی زۆرەملێ دەخاتە ڕوو. 

نووسینگەی ڕاگەیاندنی سەرۆکی ئەنجومەنی نوێنەرانی عێراق بڵاویکردەوە، هەیبەت حەلبوسی لە میانی سەردانێکیدا بۆ وەزارەتی بەرگری و کۆبوونەوەی لەگەڵ سەرۆکی ئەرکانی سوپا و فەرماندە سەربازییەکان، پێشنیازی یاسای خزمەتی سەربازیی زۆرەملێ دەخاتە ڕوو. 

نووسینگەی ڕاگەیاندنی سەرۆکی ئەنجومەن بڵاوی کردوەتەوە، لە کۆبوونەوەکەدا گفتوگۆی چڕ دەربارەی گرنگیی گەڕانەوە بۆ خزمەتی سەربازیی زۆرەملێ کراوە، وەک بژاردەیەکی ستراتیژی بۆ بنیاتنانی بنکەیەکی مرۆیی ڕێکخراو کە بتوانێت بەرپرسیارێتی نیشتمانی لە ئەستۆ بگرێت و تواناکانی سوپای عێراق بەهێزتر بکات. 

سەرۆکی پەرلەمان جەختی لەوە کردووەتەوە کە ئەم هەنگاوە تەنیا ڕەهەندی ئەمنی نییە، بەڵکو دەبێتە هۆی دروستکردنی نەوەیەکی بەدیقەت و هۆشیار، هاوکات رۆڵی دەبێت لە کەمکردنەوەی ڕێژەی بێکاری و پاراستنی گەنجان لە دیاردە نەرێنییەکان و بەهێزکردنی ئینتیمای نیشتمانی و یەکگرتوویی کۆمەڵایەتی لەنێوان پێکهاتەکاندا. 

بەپێی ڕاگەیەندراوەکە، پێشنیازکردنی ئەم یاسایە دوای زنجیرەیەک ڕاوێژ لەگەڵ سەرۆکایەتی کوتلەکان و ئەندامانی پەرلەمان هاتووە، تاوەکو لە چوارچێوەی ڕێڕەوێکی یاساییدا پەسەند بکرێت کە خزمەت بە بەرژەوەندیی گشتی و پێداویستییەکانی ئاسایشی نیشتمانی لە قۆناغی داهاتوودا بکات.