پزیشكیان تۆمەتی "ناپاكی" لە تیمی دانوستانكار ڕەت دەكاتەوە

پەیام

سەرۆككۆماری ئێران، ڕایگەیاند: بڕیاری بەردەوامبوون لە دانوستانەكان بە ڕەزامەندیی ڕێبەری باڵا و ئەنجوومەنی ئاسایشی نیشتمانی دراوە و تۆمەتباركردنی بەرپرسان بە "ناپاكی" قبوڵنەكراوە. 

مەسعوود پزیشكیان سەرۆككۆكاری ئێران لە وتەیەكیدا لەگەڵ بەڕێوەبەرانی دەزگاكانی ڕاگەیاندنی وڵاتەكەی وتی: زۆر جێگەی داخە ئەو كەسانەی لە ئەركێكی فەڕمییدا خەریكی پاراستنی بەرژەوەندییە نیشتمانییەكانن، ڕووبەڕووی تۆمەتی ناپاكی ببنەوە. 

ناوبراو ڕوونی كردەوە "ئەوەی لە تەلەفزیۆنی فەرمی و میدیاكاندا باس دەكرێت گوزارشت لە ڕای ڕاستەقینەی ڕێبەری باڵا ناكەن، چونكە بڕیاری كۆتایی لەسەر جەنگ و دانوستان تەنیا لە دەستی موجتەبا خامنەییدایە"؛ پزیشكیان داوای لە هەموو ڕەوتە سیاسییەكانی وڵاتەكەی كرد یەكگرتوو بن و پابەندی ئەو بڕیارانە بن كە لە لایەن باڵاترین دەسەڵاتی وڵاتەوە دراون تاوەكو ڕێگری لە هەر پشێوییەك بكرێت.

سەرۆككۆماری ئێران وتیشی: تۆمەتباركردنی بەرپرسان بە نیشتیمانفرۆشی و ناپاكی جێی قبوڵ نییە.

ئەم لێدوانەی پزیشكیان دوای ئەوە دێت كە لایەنگرانی ڕەوتە توندڕەوەكان لە شارەكانی تاران، مەشهەد و قوم دژی هەر جۆرە لێكتێگەیشتنێك لەگەڵ ئەمریكا ڕژانە سەر شەقامەكان و دروشمیان دژی عەباس عەراقچی، وەزیری دەرەوە و محەمەد باقر قالیباف، سەرۆكی پەرلەمان وتەوە و ئەوانیان بە "سازشكار" ناوبرد.