عەراقچی: ئاسایشی ناوچەكە بەبێ ئێران نایەتە دی

پەیام

وەزیری دەرەوەی ئێران ڕایگەیاند كە جەنگی ئەم دواییە پێگەی وڵاتەكەی وەك زلهێزێكی ناوچەیی چەسپاندووە و چیتر هیچ لایەنێك ناتوانێت لە هاوكێشە ئەمنییەكاندا پشتگوێی بخات. 

عەباس عەراقچی، وەزیری دەرەوەی ئێران، لە كۆبوونەوەیەكدا لەگەڵ كەسایەتییە ئایینی و سیاسییەكان لە تاران، جەختی كردەوە كە ئاسایشی ناوچەكە بەبێ ئامادەیی و ڕەزامەندیی وڵاتەكەی نایەتە دی. 

ناوبراو ئاماژەی بەوە كرد، ئێران تەنیا لە جەنگدا سەركەوتنی بەدەست نەهێناوە، بەڵكو چەندین دەستكەوتی ستراتیژیی بەدەستهێناوە كە وای كردووە وڵاتانی ناوچەكە بگەنە ئەو بڕوایەی، گەشەی ئابووری و ئارامیی هەمیشەیی تەنیا لە ڕێگەی هاوكاریی بەكۆمەڵ و بەشداریی كاریگەری ئێرانەوە دەبێت. 

وەزیری دەرەوە ڕوونیكردەوە، كە جاران بەهۆی سزاكانەوە وێنایەكی لاواز بۆ ئێران لە ئاستی نێودەوڵەتیدا دروست كرابوو، بەڵام ئەم جەنگە ئەو وێنەیەی گۆڕی و هێزی ڕاستەقینەی تارانی پیشانی جیهان دا، وتیشی: ئێستا جیهان دركی بەوە كردووە كە فەرامۆشكردنی ئێران لە هاوكێشەكاندا مەحاڵە و تاران وەك پایەیەكی سەرەكیی سەقامگیری لە ڕۆژهەڵاتی ناوەڕاستدا دەمێنێتەوە، بۆیە پێویستە هەموو پلانە ئەمنییەكان لەسەر بنەمای ئەم واقیعە نوێیە دابڕێژرێنەوە و كەس ناتوانێت ڕۆڵی ئێران پشتگوێ بخات.