پێش 4 هەفتە
110 جار خوێنراوەتەوە
بەشێک لە بڕگەکانى دانوستانەكانى تاران و واشنتۆن، لە ئێران مشتومڕی دروستكردووە
پەیام
دانوستانەكان لەگەڵ ئەمریكا و بڵاوبوونەوەی بڕگە ئەگەرییەكانی یاداشتنامەیەكی لێكتێگەیشتن لە ئێراندا مشتومڕی دروست كردووە.
لە نووسینێكیدا لە تۆڕی"ئێكس"، مەحموود نەبەویان پەرلەمانتاری ڕەوتی پارێزگارەكان لە پەڕلەمانی ئێران باسی لەو بڕگانە كرد لە میدیاكاندا لەسەر ڕێككەوتنە ئەگەرییەكەی نێوان تاران و واشنتن بڵاو بوونەتەوە.
مەحموود نەبەویان بە ئاماژەدان بە "كردنەوەی دەستبەجێ و بێ كۆتوبەندی گەرووی هورمز بەخۆڕایی، كەمكردنەوەی پیتاندنی یۆرانیۆم" هەروەها بوونی ناڕوونی سەبارەت بە لادانی سزاكان لەسەر ئێران و ئازادكردنی سەرمایە بەستراوەكانی و ئەگەری سوودمەندبوونی لە سندووقێكی دارایی بە بڕی 300 ملیار دۆلار" . پرسیاری كردووە: "ئایا ئەم دەقە بەرژەوەندییە نیشتمانییەكان بەدی دەهێنێت؟"
لە لایەكی دیكەوە، ئیبراهیم ڕەزایی، وتەبێژی لیژنەی ئاسایشی نیشتمانی و سیاسەتی دەرەوە لە پەڕلەمانی ئێران لە بڵاوكراوەیەكدا، ئاماژەی بەوە كرد كە تیمی دانوستانكاری ئێرانی "سازشی گەورە"یان كردووە.
ڕەزایی ڕایشیگەیاند: دەستكراوەیی لەسەر مێزی دانوستان بووە هۆی گۆڕانی حیساباتەكانی دوژمن و دروستكردنی ئەو بڕوایەی ئێران لە پێگەیەكی لاوازدایە.
هەر لەو چوارچێوەیەشدا، دوێنێ، شەممە، ژمارەیەك هاووڵاتی لە ناوەڕاستی تارانی پایتەخت بۆ ناڕەزایەتی دەربڕین بەرانبەر بە دانوستانەكان لەگەڵ ئەمریكا گرد بوونەوە و دروشمیان دژی سەرۆكی پەرلەمان و وەزیری دەرەوەی وڵاتەكەیان وتەوە.
لە تۆڕە کۆمەڵایەتیەکان شەیری بکە