1 کاتژمێر پێش ئێستا
155 جار خوێنراوەتەوە
دەوڵەتی یاسا: ئەگەری هەیە وادەی كۆكردنەوەی چەكی گروپەكان دوابخرێت
پەیام
دەوڵەتی یاسا ئاماژە بە ئەگەری دواخستنی وادەی كۆكردنەوەی چەكی گرووپە چەكدارەكان لە عێراق دەكات.
زوهێر چەلەبی، ئەندامی هاوپەیمانی دەوڵەتی یاسا ڕایگەیاند، دۆسیەی سنوورداركردنی چەك لە دەستی دەوڵەتدا هێشتا یەكلایی نەكراوەتەوە و ڕەنگە ئەو وادەیەی حكومەت دیاری كردبوو دوابخرێت.
چەلەبی ئاماژەی بەوە كرد كە ڕێكەوتی 30ی ئەیلوول كاتێكی كۆتایی نییە و باس لەم بابەتە دەخرێتە دوای دڵنیابوونەوە لە كشانەوەی تەواوەتی هێزەكانی ئەمریكا و توركیا لە عێراق.
هەروەها جەختی كردەوە كە لە ئێستادا سەرنج لەسەر ناردنی یاسای حەشدی شەعبییە بۆ پەرلەمان، كە تێپەڕاندنی ئەم یاسایە وەك ڕووبەڕووبوونەوەیەك بەرانبەر فشارەكانی ئەمریكا دەبینرێت.
ئەم لێدوانانە لەكاتێكدایە كە حكومەتی عێراق پێشتر 30ی ئەیلوولی وەك دوا مۆڵەت بۆ چەكداماڵینی گروپەكان دیاری كردبوو، وتەبێژی حكومەت ئاشكرای كردبوو كە شەش گروپ بە ئەرێنی وەڵامی داواكارییەكەیان داوەتەوە، بەڵام گروپەكانی تر هێشتا لە گفتوگۆدان بۆ گەیشتن بە ڕێككەوتنێك كە بەرژەوەندی دەوڵەت و وڵات بپارێزێت.
لە تۆڕە کۆمەڵایەتیەکان شەیری بکە