1 کاتژمێر پێش ئێستا
149 جار خوێنراوەتەوە
مووچهی مانگی ههشت خرایه سهر ههژماری وهزارهتی دارایی ههرێم
وەزارەتی دارایی و ئابووریی هەرێمی کوردستان ڕایگەیاند بڕی ٨٣١ ملیار و ٦٦٦ ملیۆن دینار وەک تەمویلی مووچەی مانگی ئابی مووچەخۆران خرایە سەر هەژماری بانکیی وەزارەت لە هەولێر.
ئەم بڕە پارەیە وەک شایستەی دارایی مانگی ئابی فەرمانبەران و مووچەخۆرانی هەرێمی کوردستان، لەلایەن وەزارەتی دارایی فیدراڵییەوە ڕەوانە کراوە و لە لقی هەولێری بانکی ناوەندیی عێراق خراوەتە سەر هەژماری بانکیی وەزارەتی دارایی و ئابووریی هەرێمی کوردستان.
بەپێی ڕاگەیەندراوی وەزارەتی دارایی، هاوشێوەی مانگەکانی ڕابردوو، وەزارەتی دارایی فیدراڵ بڕی ١٢٠ ملیار دیناری وەک پشکی گەنجینەی فیدراڵی لە داهاتی نانەوتیی هەرێم بڕیوە. جگە لەوەش، بڕی ٦ ملیار و ٣٠ ملیۆن و ١٦٦ هەزار و ٥٤٥ دیناری لە تەمویلی مووچەی مانگی ئاب نەناردووە، کە تایبەت بووە بە شایستەی مووچەی مانگەکانی پێشووی خانەنشینانی شارستانی و سەربازی.
وەزارەتی دارایی جەختی کردووەتەوە کە دوای تەواوکردنی ڕێکارەکان و وەرگرتنی پارەکە بەشێوەی کاش لە لقی هەولێری بانکی ناوەندیی عێراق، ڕاستەوخۆ لیستی مووچە بڵاو دەکرێتەوە و لە نزیکترین کاتدا دەست بە پرۆسەی دابەشکردنی مووچەی مانگی ئاب دەکرێت.
لە تۆڕە کۆمەڵایەتیەکان شەیری بکە