نه‌مسا ڤیزای به‌ سه‌رۆكی ڕێكخراوی وزه‌ی ئه‌تۆمی ئێران نه‌دا

تاران بە توندی سەرکۆنەی نەمسا دەکات بەهۆی هەڵوەشاندنەوەی ڤیزای محەمەد ئیسلامی، سەرۆکی ڕێکخراوی وزەی ئەتۆمیی ئێران، نوێنەری ئێران لە ئاژانسەکە ڕایگەیاند ڕێگریکردن لە سەرۆکی ڕێکخراوەکەیان پێشێلکارییەکی گەورەی مافەکانی وڵاتەکەیەتی وەک دەوڵەتێکی ئەندام. 

ئەم هەڵوێستەی تاران دوای ئەوە دێت کە دەسەڵاتدارانی نەمسا ڤیزای هاتنەناوەوەی محەممەد ئیسلامییان هەڵوەشاندەوە بۆ ڕێگریکردن لە بەشداریکردنی لە کۆنفرانسی گشتیی ئاژانسەکە لە ڤیەننا، بڕیارێک کە سەرکۆنەی ئێران و ڕووسیا و لە هەمان کاتدا پشتیوانیی ئەمریکای لێکەوتەوە. نوێنەری ئێران لە ئاژانسەکە ڕایگەیاند ڕێگریکردن لە سەرۆکی ڕێکخراوەکەیان پێشێلکارییەکی گەورەی مافەکانی وڵاتەکەیەتی وەک دەوڵەتێکی ئەندام. ناوبراو جەختی لەوە کردەوە کە ئەو هەنگاوە پێشێلکردنی بنەمای یەکسانیی سەروەرییە کە لە ماددەی چوارەمدا جێگیر کراوە. هەروەها ئاماژەی بەوە کرد نەمسا وەک وڵاتی خانەخوێ، بەپێی ڕێککەوتنی بارەگا پابەندە بە ئاسانکاریکردن بۆ هاتنەناوەوەی نوێنەرانی وڵاتانی ئەندام و پێدانی ڤیزا بە شێوەیەکی خێرا. بەڵام ڕێگریکردن لە سەرۆکی شاندەکە لە بەشداریکردن لە باڵاترین دەستەی بڕیاردانی ئاژانسەکە، شەرعییەتی کارەکانی خودی کۆنفرانسەکە لاواز دەکات. 

لە لایەکی دیکەوە، ڕافائیل گرۆسی، بەڕێوەبەری گشتیی ئاژانسی نێودەوڵەتیی وزەی ئەتۆم، داوای لە ئێران کرد ڕوونکردنەوە بدات لەسەر ئەو پرسانەی پەیوەندییان بە بەرنامە ئەتۆمییەکەیەوە هەیە. گرۆسی ڕایگەیاند ئاژانسەکە دووبارە دەستی هاوکاری درێژ دەکاتەوە و لە کاتی دەستپێکردنەوەی کارەکانیان لە ئێران، ڕەچاوی نیگەرانییە ئەمنییەکانی ئەو وڵاتە دەکەن.