2 کاتژمێر پێش ئێستا
111 جار خوێنراوەتەوە
دوو بەرپرسی عێراقی لە دەست ڕفێنەرانیان ئازاد كران
پەیام
دوو بەرپرسی عێراقی لە بەغدادی پایتەخت لە دەست ڕفێنەرانیان ئازاد كران.
دەزگای ئاسایشی نیشتمانیی عێراق ئازادكردنی دوو بەرپرسی حكوومیی پێشووی لە دەستی ڕفێنەرانی لە شاری بەغداد ڕاگەیاند.
لە ڕاگەیەنراوێكی ڤیدیۆییدا، دەزگای ئاسایشی نیشتمانیی عێراق ئاشكرای كرد كە لە ماوەی 48 كاتژمێری ڕابردوودا دەزگای ئاسایشی نیشتمانی توانیویەتی پڕۆسەیەكی ئەمنیی جۆریی لە بەغداد ئەنجام بدات.
دەزگاكە بێ ئەوەی ناوی بەرپرسەكان ئاشكرا بكات، ڕایگەیاند: لە پڕۆسە ئەمنییەكەدا توانراوە دوو بەرپرسی حكوومی پێشوو ئازاد كراون و هەشت تۆمەتباری تێوەگلاویش لە تاوانی ڕفاندن و تاوانی دیكە دەستگیر كراون.
بەپێی ڕاگەیەنراوەكە لە پڕۆسە ئەمنییەكەدا چەك و بەڵگەنامەی ساختەی گرووپێكی چەكداری دەرچوو لە یاسا لە شوێنی ڕفێنەرەكان دەستی بەسەردا گیراوە و زانیارییەكانیش دەریدەخەن كە ئەو تۆمەتبارانە پێشینەی تاوانیان هەبووە.
لە تۆڕە کۆمەڵایەتیەکان شەیری بکە