سەرۆكوەزیرانی عێراق: بۆ هێزە ئەمنییەكان نییە دەستوەردان لە نرخی دۆلاردا بكەن

پەیام 

فەرماندەی هێزە چەكدارەكانی عێراق ڕایدەگەیەنێت: نرخی دۆلار دۆسیەیەكی دارایی و ئابوورییە بۆ هێزە ئەمنییەكان نییە دەستوەردانی تێدا بكەن.

لە ڕاگەیەنراوێكدا، شانەی ڕاگەیاندنی ئەمنیی عێراق ئاشكرای كرد كە بەپێی بڕیاری عەلی زەیدی فەرماندەی گشتیی هێزە چەكدارەكان بۆ هێزە ئەمنییەكان نییە دەستوەردان لە دۆسیەی بەهای دۆلار و دراوە بیانییەكانی دیكە بكەن و ئەوە دۆسیەیەكی دارایی و ئابوورییە و تایبەتمەندی دامەزراوە تایبەتەكانە، لەپێشیانەوە بانكی ناوەندی.

بەپێی ڕاگەیەنراوەكە "هیچ بڕیار و فەرمانێكی فەرماندەیی گشتیی نییە كە ڕێگە بە هێزی ئەمنی بدات دەستوەردان لە بازاڕدا بكات، یان كاریگەری لەسەر بەهای ئاڵوگۆڕ دابنێت".

شانەی ڕاگەیاندنی ئەمنیی ڕایشیگەیاند: هەر ڕێوشوێنێك بەرانبەر كەسانی سەرپێچیكار، یان ئەوانەی كاری نایاسایی لە مامەڵە بە دراوی بیانییەوە دەكەن بەپێی ڕێوشوێنە یاسایی و دادوەرییەكان و بە هەماهەنگی لەگەڵ بانكی ناوەندی دەبێت.

شانەی ڕاگەیاندنی ئەمنیی جەختیشی كردەوە كە هێزە ئەمنییەكان دەستوەران لە دیارییكردنی نرخی ئاڵوگۆڕ و مامەڵە بازرگانی و داراییەكان ناكەن و كاریان تەنیا جێبەجێكردنی یاسا و بڕیارەكانی دەسەڵاتی دادوەرییە، بۆیە ڕوو لە كۆمپانیاكانی ئاڵوگۆڕ و مامەڵەكارانی بازاڕ دەكات كە بە دڵنیاییەوە كاری خۆیان بكەن.