دانەغاز: لەئێستادا ناتوانرێت هیچ بڕە غازێك بەرهەم بهێنرێت

پەیام
كۆمپانیای دانەغاز ڕایدەگەیەنێت: وێستگەی كۆرمۆر زیانی گەورەی بەر كەوتووە و لەئێستادا ناتوانرێت هیچ بڕە غازێك بەرهەم بهێنرێت.
وتەبێژی كۆمپانیای دانەغازی ئیماراتی سەبارەت بە دۆخی كێڵگەی كۆرمۆر ئاشكرای كرد "بەهۆی ئەو زیانە گەورەیەی بەر وێستگەكە كەوتووە، لەئێستادا هیچ بڕە غازێك بەرهەم ناهێنرێت".

لە ڕوونكردنەوەیەكدا، وتەبێژی دانەغاز كە كۆمپانیای سەرەكی بەڕێوەبردن و پەرەپێدانە لە كێڵگەی غازی كۆرمۆر لە قەزای چەمچەماڵ، ڕەخنە لە بەشێك لە میدیا نێوخۆییەكان دەگرێت و ڕایدەگەیەنێت: ژمارەیەك میدیا نێوخۆییەكان بە بێ بوونی زانیاری دروست لێدوانی ناڕاست سەبارەت بە دۆخی وێستگەی غازی كۆرمۆر دەدەن.

كۆمپانیاكە داوا لە كەناڵەكانی ڕاگەیاندن دەكات خۆیان لە ڕووماڵكردنی نابەرپرسانە و پێشبینی و لێكدانەوەی بێبنەما بەدوور بگرن.
كۆمپانیا ئیماراتییەكە ڕایشیدەگەیەنێت: وەك پێشتریش لەلایەن سەرچاوە فەرمییەكانەوە ڕاگەیەنراوە، زیانێكی گەورە بەر وێستگەكە كەوتووە و لە ئێستادا ناتوانرێت هیچ بڕە گازێك بەرهەم بهێنرێت.

ئەمەو شەوی یەكشەممەی ڕابردوو، هەشت لەسەر نۆی مانگ لە ڕێی فڕۆكەی بێفڕۆكەوانی بۆمبڕێژكراوەوە هێرش كرایە سەر كێڵگەی كۆرمۆر و لەو كاتەوە بەرهەمهێنانی غاز ڕاگیراوە.