لە ئۆپراسیۆنێكدا لە پردێ سێ چەكداری داعش كوژران و چەكدارێكیش دەستگیركرا

پەیام

هێزە عێراقیەكان ئۆپراسیۆنێكی سەربازییان لە شارۆچكەی پردێ ئەنجامدا و بەو هۆیەوە ژمارەیەك چەكداری داعش كوژران.
دوای بینینی ئۆتۆمبێلێك لە سنووری پردێ كە گومان دەكرا چەكداری داعشی تێدا بێ لە ئێوارەی هەینی، هێزێكی زۆری سوپا و دژەتیرۆری عێراق گەیشتنە ناوچەكە و ڕێگەی سەرەكی كەركووك - هەولێر داخرا و هەڵمەتێكی سەربازیی لە ناوچەكە دەستیپێكرد و ڕووبەڕووبوونەوەی چەكداری ڕوویدا.

بە گوێرەی زانیارییەكان ئەو ئۆتۆمبێلەی لە ناحیەی پردێ بینراوە، ئۆتۆمبێلی چەكدارانی داعش بووە و ویستویانە لە پردێوە بپەڕنەوە بۆ چەند ناوچەیەكی دیكە.
شانەی ڕاگەیاندنی ئەمنیی عێراق لە ڕاگەیەنراوێكدا بڵاوی كردەوە لە ئۆپەراسیۆنێكی پێشوەختە و لە ڕێگەی هێرشێكی ئاسمانیی ورد لە سنووری شارۆچكەی پردێ لە باكووری كەركووك، سێ چەكداری تیرۆریست كوژران و چەكدارێكی دیكەش كە ئەركی گواستنەوەی لە ئەستۆ بوو، دەستگیركرا.