لایەنى فەلەستینى: وەڵاممان بۆ پلانەكەی ئەمریكا لەسەر غـ.ەززە دوا ناكەوێت

پەیام 

ئەندامێكی مەكتەبی سیاسی بزووتنەوەی حەماس ڕایگەیاند، بزووتنەوەكە زۆر نزیكە هەڵوێستی خۆی لەبارەی پلانی ئەمریكا بە ئاشكرا ڕابگەیەنێت.

لە لێدوانێكدا محەمەد نەزال ئاماژەی بەوە كردووە، وەڵامەكەی حەماس دواناكەوێت و بەرژەوەندییەكانی گەلی فەلەستین و بنەما سەرەكی و ستراتیژییەكان و ڕەچاوكردنی سیاسی لەبەرچاو دەگرێت، جەختیشی كردەوە، ڕێگە بە بەردەوامبوونی كۆمەڵكوژی نادەن.

ڕوونیشی كردەوە، بزووتنەوەكە لە بنەما نەرێنییەكانەوە دەست پێناكات، بەڵام "لۆژیكی هەڕەشە و فەرمان و ئەو فشارانە قبوڵ ناكات كە وەك شمشێری كات بەكاردەهێنرێن".

محەمەد نەزال دووپاتی كردەوە، حەماس ئێوارەی دووشەممەی ڕابردوو ئەو پلانەی وەرگرتووە كە "بە ناوی دۆناڵد ترەمپ، سەرۆكی ئەمریكا، خراوەتەڕوو"، دەشڵێت، تێبینی زۆری لەسەرە بەڵام بزووتنەوەكە دەیەوێت جەنگی سەر غەززە كۆتایی پێ بهێنرێت.

جەختیشی كردەوە، ناكرێت دوای هەموو ئەم قوربانییە دەست لە مافەكانی گەلی فەلەستین هەڵبگرن، كەواتە حەماس مافی ئەوەی هەیە تێبینی هەبێت بە جۆرێك بەرژەوەندیی فەلەستینییەكان بەدی بهێنێت و لۆژیكی گفتوگۆ قبوڵ دەكات.