لە جیاتی قوتابیان واخەریکە خوێندن دەکەوێت

جاران قوتابی ڕاسب دەبوو، ئێستا قوتابخانە و مامۆستا و حکومەت و خوێندن ڕاسب دەبن!
جاران بۆ ڕزگاری وڵات لە نەخوێندەواری خولی فێرکردنی گەوران (محو الٲمیة)یان دەکردەوە تافێری خوێندەواری بن.
کەچی ئێستا بێتێچوون و بێخول مناڵی فەقیر و هەژاری ئەم وڵاتە نەخوێندەوار دەکرێن!

خوێندن پڕۆسەیەکی درێژخایەنی موتەکامیللی نیشتیمانییە، پێکدێت لە(قوتابی و مامۆستا و پڕۆگرام و سیستم و بەڕێوەبردن و مافەکان) بۆ هەموو ئەمانەش پێویستە حکومەت مافە دارایەکانی مامۆستایان و بەڕێوەبەران و سیستەمەکە لەئەستۆ بگرێت.
گەلۆ سەیرە دەسەڵات بێماندوو بوون ڕایهێناین کەخەڵک حکومەت بەخێوبکات! ماوەی 12ساڵە دینارێکت لەقوتابخانەیەک خەرج نەکردبێت و خێرخواز و دایک و باوکی قوتابی بەوئەرکە هەڵسابن و پارەی حانوتی مەکتەبەکانیشت کێشابێتەوە، موچە 60مانگ واتا پارەی 5ساڵی مامۆستاو فەرمانبەرانت خواردبێت لەماوەی ئەو 11ساڵەدا، ئەوە چ مواسەفاتێکی بەڕێوەبردنە؟!
ئەرێ بەڕاست ئێمە لەجیهانی مۆدێرینەی سەدەی 21ین یان ئێستاش لەسەدەی 2و  زەمەنی دەرەبەگایەتیداین؟!
گەلێک لەسەر خاکێکی یەک پارچە زێڕ و نەوت و غاز و سامانی مرۆیی بەدرێژایی 12ساڵ دەسەڵاتداری کوردی وەک ئەوەی کە ئەم وڵاتە یەک قوتابی تێیا نەبێت، تەنها یەک هەنگاویش بەئاڕاستەی چارەسەری ژیانی مامۆستایان و موچەخۆرانی ناگرێتەبەر، کەلایەزال ژیانی خوێندنی 2ملیۆن و 200هەزار قوتابی لە لێواری ڕاگەیاندنی ڕاسب بوندایە!
دەزانن یانی چی؟ یانی یەک لەسەر سێی دانیشتوانی کوردستان سەرگەردان و ماڵوێرانن، کەچی دەسەڵات لەجیاتی گرتنەبەری ڕێگە چارە هەموو هەوڵەکانی ئەوەیە لەڕێگەی ڕاگەیاندنێکی فەیکی فەیسبوک و ماکینەیەکی تێروپڕی ئیعلامی حیزبی وانیشان بدات شتێک لەگۆڕێدا نییە بەناوی کێشەی خوێندن!!
دەیانەوێت بڵێن موعالەجەی ئەو قەیرانە گەورەی ڕاسب بوونی خوێندن و خوێندەوارییە، بە دوو پۆستی فەیسبوک و دوو هەواڵی درۆینە، داهاتوویەکی ڕاسبووی مسۆگەری کوڕان و کچانمان لە زانست و پەروەردە چارەسەر دەکات؟!
ئەگەر وابڕوات، لەدەهۆڵی تێکشکانی پەروەردەو زانست بدەن و شتێک بەناوی چارەسەری بۆ پڕۆسەی پەروەردە و فێرکردن نامێنێتەوە و قەیرانەکانی 11ساڵی ڕابردوو بۆ گەرم و گوڕکردنەوەی مامۆستایان و پەروەردەکاران و قوتابخانەکان، لەخەونی حوشتر زیاتر نابێت!
ئای چ زروفێکە تێی کەوتووین حکومەت لەجیاتی پاڵپشتی نەخوێندەواران، میللەتی بەرەونەخوێندەواری ڕاستەقینە تاودەدات؟!!