کارڤاخاڵ هەموو شتێکی لەسەر هاتنی ڕاهێنەری نوێ و یاریزانێک ئاشکرا کرد

پەیام سپۆڕت - مەڕوان تاڵیب

دانی کارڤاخاڵی بەرگریکاری ڕیاڵ مەدرید ئاشکرای کرد، چابی ئالۆنسۆ دەبێتە ڕاهێنەری داهاتوویان و ئامانجیشیان بردنەوەی نازناوی جامی جیهانی یانەکانە.

 لە لێدوانێکیدا بۆ ماڵپەڕی فیفا، کارڤاخال سەبارەت بە ئامانجیان لە مۆندیالی داهاتووی یانەکاندا وتی: ئەمە دوایین نازناوی ئەم وەرزەیە کە لەبەردەستماندا ماوە و هەموو هەوڵێک دەدەین بۆ بەدەستهێنانی، ئامانجێکی ڕوونە بۆ هەمووان لە یانەکەدا، چونکە ئەگەر چامپیۆنسلیگ، یان لالیگا یاخود جامی وڵاتەکەت نەبەیتەوە فشارەکان زۆر دەبن، تۆپی پێ بەندە بە ئەنجامەکانەوە و لەو ڕێگەیەشەوە چارەنووسی ڕاهێنەر دیاری دەکرێت.

دانی باسی لە هاتنی چابی ئالۆنسۆ کرد و پشتڕاستی کردەوە، پێدەچێت شوێنی ئانچلۆتی بگرێتەوە و لە دوو وەرزی ڕابردوو لەگەڵ لیڤەرکوزن ئاستێکی بەرزی نیشانداوە و کاتیش بڕیار دەدات گونجاو دەبێت بۆ ڕیاڵ یاخود نا.

لە کۆتایدا کارڤاخاڵ سەبارەت بە هاتنی هاوسن و ڕکابەریکردنی لەگەڵ ئاڕنۆڵد ڕایگەیاند، دین هاوسن گرێبەستێکی نایابە و یاریزانێکی باشە و زۆر هاوکاریان دەبێت، هەرچەندە بۆندی ئاڕنۆڵد هێشتا ڕانەگەیەنراوە، بەڵام پێدەچێت بێتە یانەکە و ڕکابەری لەگەڵدا دەکات بۆ پێکهاتەی سەرەکی.