دادگای ئیسپانیا لێکۆڵینەوە لە بەرشەلۆنە و ئەتلەتیکۆ مەدرید دەکات

پەیام سپۆڕت - مەڕوان تاڵیب

دادگای ئیسپانیا بڕیاریدا لەسەر گواستنەوەی یاریزانێک لێکۆڵینەوە لە یانەکانی بەرشەلۆنە و ئەتلەتیکۆ مەدرید بکات.

 هاوینی 2019 ئانتوان گریزمان لە ڕۆخی بلانکۆسەوە پەیوەندی بە بلاوگراناوە کرد بە بڕی نزیکەی 130 ملیۆن یۆرۆ و دواتر لە ساڵی 2021 بە خواستن گەڕایەوە ئەتلەتیکۆ و دوو وەرز دواتر بە 25 ملیۆن یۆرۆ گرێبەستەکەی بە هەمیشەیی کرا.

ڕۆژنامەی "موندۆ"ی کەتەلۆنی ئاشکرای دەکات، دادگای ئیسپانیا لێکۆڵینەوەی دادوەری بۆ بەرشەلۆنە کردووەتەوە بە گومانی ژمێریاری ساختە لەکاتی گرێبەستکردنیان لەگەڵ گریزمان.

سەرچاوەکە ئاماژە بەوەش دەکات، دادگا ئاگاداری ئەو بەڵگەنامانە بووە کە بە نهێنی لە نێوان بەرشەلۆنە و گریزمان کراوە کاتێک یاریزانی ئەتلەتیکۆ بووە پێش ئەوەی بۆندەکەی تەواو بێت ئەمەش پێشێلکردنی یاساکانی فیفایە کە دەبێت سەرەتا پەیوەندی بە یانەکەیەوە بکرێت نەک گفتوگۆ لەگەڵ خودی یاریزانەکە.

لە کۆتایدا ڕۆژنامەکە ڕوونی دەکاتەوە، لەو کاتەدا ئەتلەتیکۆ سکاڵای دژی بەرشەلۆنە کردووە، بەڵام دواتر هەردوولا ڕێککەوتن و بلاوگرانا نزیکەی 15 ملیۆن یۆرۆی دیکەی بە یانە مەدریدییەکە داوە و سکاڵاکەی کشاندووەتەوە و ئێستا دادگا دووبارە بڕیاریداوە لێکۆڵینەوە لە هەردوو یانەکە بکات بە تۆمەتی فێڵکردن و ساختەکاری لە گرێبەستی گریزمان بۆ یانەی بەرشەلۆنە.