19 کاتژمێر پێش ئێستا
135 جار خوێنراوەتەوە
وەزارەتی دەرەوەی ئێران: وەڵامدانەوەی هێرشەکان مافێكی یاسایی و ڕێگەپێدراوى خۆمانە
پەیام
هەر لە چوارچێوەی كاردانەوەكانی ئێراندا، وەزارەتی دەرەوەی ئێران هێرشەكانی بە پێشێلی یاسا نێودەوڵەتییەكان ناو هێنا و ڕایگەیاند: وەڵامدانەوەی ئەو هێرشانە مافێكی یاسایی و ڕێگەپێدراوى خۆمانە.
لە بەیاننامەیەكیدا وەزارەتی دەرەوەی ئێران ڕایگەیاند "هێرشەكانی ڕژێمی زایۆنی، پێشێلكردنی بڕگەی دووی ماددەی چواری پەیماننامەی نەتەوە یەكگرتووەكان و دەستدرێژیی ئاشكرا بۆ سەر ئێرانە".
وتیشی: "وەڵامدانەوەی ئەم دەستدرێژییە مافێكی یاسایی و ڕێگەپێدراوی ئێرانە بەپێی ماددەی 51 پەیماننامەكە، كە هێزە چەكدارەكانی ئێران بە تەواوی هێز و بەشێوەیەك كە خۆی دیاریی دەكات، وەڵامدانەوەكە دوا ناخات".
وەزارەتی دەرەوەی ئێران داوایشی لە ئەنجومەنی ئاسایشی نێودەوڵەتی كرد هەنگاوی بەپەلە بۆ ڕووبەڕووبوونەوەی ئەو كارەی قەوارەكە بنێت كە "پێشێلكردنی ئاشتی و ئاسایشی نێودەوڵەتییە". هەروەها داوا لە هەموو وڵاتانی ئەندام لە نەتەوەیەكگرتووەكان و بەتایبەت وڵاتانی ناوچەكە و ئیسلامی دەكات بەزووی ئەم هێرشەی ئیسرائیل ئیدانە بكەن و "هەنگاوی بەپەلە و دەستەجەمعی" بنێن بۆ ڕووبەڕووبوونەوەی.
وەزارەتەكە هۆشدارییش دەدات دەستدرێژییەكە ئاشتی و ئاسایشی جیهانیی خستووەتە بەردەم هەڕەشەیەكی بێپێشینە، كاریگەری و لێكەوتە مەترسیدارەكانی لە ئەستۆی ئەم ڕژێمە و پارێزەرانیەتی".
وەزارەتی دەرەوەی ئێران پێیوایە "ئەم دەستدرێژییەی ئیسرائیل، ناكرێت بەبێ‌هەماهەنگی و ڕێگەپێدانی ئەمریكا ئەنجام درابێت"، بۆیە دەڵێت "لەسەر ئەم بنەمایە، دەوڵەتی ئەمریكا وەكوو پارێزەری سەرەكیی ئیسرائیل، بەرپرسیارە لە كاریگەری و لێكەوتەكانی ئەم دەستدرێژییە".
لە تۆڕە کۆمەڵایەتیەکان شەیری بکە