لەسەر پێشنیازی ئیسپانیا نەتەوە یەكگرتووەكان داوای ئاگربەستی بەپەلە لە غەززە دەكات

پەیام 

ماوەی 88 ڕۆژە ئاگربەستی غەززە پێشێل دەكرێت و قەوارەی زایۆنی لە جەنگی كۆمەڵكوژی و قڕكردرنی خەڵكەكەی بەردەوامە.

سەرچاوە پزیشكییەكان لە نەخۆشخانەكانی كەرتی غەززەوە ئاشكرایان كرد لە بەرەبەیانی ئەمڕۆوە 52 فەڵەستینی لە بۆردومان و تۆپبارانی داگیركەردا شەهید بوون كە 26یان لەو كەسانە بوون كە چاوەڕێی وەرگرتنی هاوكاری بوون.

لە شاری قودسی داگیركراویش دەیان جوولەكەی نیشتەجێكراو حەڕەمی مزگەوتی ئەقسای پیرۆزیان شكاند و لەژێر پاسەوانیی پۆلیسی داگیركەردا چوونە ناو حەوشەی مزگەوتەكەوە و نوێژی تلمودیان ئەنجام دا و بێڕێزانە بە حەرەمی مزگەوتەكەدا گەڕان.

لەلایەكی دیكەوە شەوی ڕابردوو كۆمەڵەی گشتیی نەتەوەیەكگرتووەكان پڕۆژە بڕیارێكی پەسەند كرد كە لەلایەن ئیسپانیاوە پەسەند كرابوو و تیایدا بە توندی سەركۆنەی قەوارەی زایۆنی كراوە بەهۆی بەكارهێنانی برسیكردن وەك چەكی جەنگ هەروەها ڕێگەگرتن لە گەیشتنی هاوكارییەكان بە خەڵكی غەززە.

لە پرۆژە بڕیارەكەی نەتەوەیەكگرتووەكاندا داوا كراوە بەپەلە ئاگربەستی بێ مەرج و هەمیشەیی ڕابگەیەنرێت و هەموو لایەكیش پێیەوە پابەند بن.

لەوبارەیەوە بزووتنەوەی حەماس پێشوازیی لە پرۆژە بڕیارەكەی نەتەوەیەكگرتووەكان كرد و ڕایگەیاند: دەنگدانی تەواوی وڵاتان لە بەرژەوەندیی بڕیارەكەدا سەركەوتنێكی سیاسیی و ئەخلاقیی گەلە خۆڕاگرەكەمانە و بەڵگەیە لەسەر شكستی داگیركەر.

حەماس ڕاشیگەیاندووە: ئەم دەنگدانە وەڵامێكی یەكلاكەرەوەیە بۆ ئەمریكا كە هەفتەی ڕابردوو دژی غەززە و فەڵەستین مافی ڤیتۆی بەكارهێنا.