ئەمریكا چوارەم كەشتیی جەنگیی ڕەوانەی ڕۆژهەڵاتی دەریای ناوەڕاست كرد

پەیام 

ڕاگەیاندنە نێودەوڵەتییەكان گەیشتنی چوارەمین كەشتیی جەنگیی ئەمریكایان بۆ ڕۆژهەڵاتی دەریای ناوەڕاست ئاشكرا كرد. 

ڕۆژنامەی وۆڵ ستریت جۆرناڵی ئەمریكی ڕایگەیاند: بۆ هاوكاریكردنی ڕووبەڕووبوونەوەی مووشەكەكانی ئێران، چوارەم كەشتی جەنگی ئەمریكی گەیشتووەتە ڕۆژهەڵاتی دەریای ناوەڕاست. 

بەرپرسێكی ئەمریكیش كە نەیویست ناوەكەی ئاشكرا بكرێت ڕایگەیاند: ویلایەتە یەكگرتووەكان دەستی بە جووڵەپێكردنی هێزە دەریاییەكانی بەرەو ڕۆژهەڵاتی ناوەڕاست كردووە، ئەوەش لەچوارچێوەی هاوكاری ئیسرائیلدا لەنێو بەردەوامی گرژییە سەربازییەكانی لەگەڵ ئێراندا. 

بەرپرسە ئەمریكییەكە ڕونیشیكردەوە، دەریاوانی ئەمریكا كەشتی جەنگی دژە مووشەكی ئاڕاستەكراوی (تۆماس هەنتەر)ی لە ئەوروپاوە بۆ ڕۆژهەڵاتی ناوەڕاست گواستووەتەوە، ئاماژەی بەوەشدا، ئامانج لەو كارە بەهێزكردنی توانای بەرگری ئاسمانی و مووشەكییە بۆ ئیسرائیل، بە تایبەتی لە ڕووبەڕووبوونەوەی مووشەكە بالیستییەكانی ئێراندا. 

هەروەها ڕایگەیاند: ئەگەری هەیە پێنجەم كەشتی جەنگیش ڕەوانە بكرێت، سەبارەت بە (تۆماس هەنتەر)یش جەختی كردەوە، سیستمی بەرگری پێشكەوتووی لە جۆری (ئیگیس)ی تێدا دانراوە، كە توانای دەستنیشانكردن و بەرەنگاربوونەوەی ئاسمانی و مووشەكی دوورمەودای هەیە، هەروەها جەختی كردەوە، ویلایەتە یەكگرتووەكان پابەندە بە پاراستنی ئاسایشی ئیسرائیل لە بارودۆخە نەخوازراوەكان كە ناوچەكە بەخۆیەوە دەبینێت.