پزیشكیان: ئیسڕائیل هەوڵی تیرۆركردنی دام بەڵام شكستی هێنا

پەیام 

مەسعود پزیشکیان سەرۆكۆماری ئێران ڕایگەیاند ئیسڕائیل هەوڵی تیرۆركردنی داوە لە كاتی هێرشكردنە سەر وڵاتەكەی بەڵام شكستیان هێناوە.

پزیشكیان لە گفتوگۆیەكدا لەگەڵ بێژەری ئەمریكی تاكر كارڵسۆن، لە وەڵامی پرسیارێكدا سەبارەت بە هەوڵی تیرۆركردنی لەلایەن قەوارەی زایۆنیەوە، وتی: بەڵێ هەوڵیاندا تیرۆرم بكەن و كاریان لەسەر كرد، بەڵام شكستیان هێنا.

سەبارەت بە دەستپێكردنەوەی دانوستانەكان لە بارەی دۆسیەی ئەتۆمی وڵاتەكەی، دوای هەڵپەساردنی هاریكارییەكان لەگەڵ ئاژانسی نێودەوڵەتی بۆ وزەی ئەتۆم، پزیشكیان ڕایگەیاند: ئێران ئامادەیە بۆ گفتوگۆ لەگەڵ ئەمریكا، بەڵام لە هەمان كات ئاماژەی بەوە كرد بەهۆی هێرشەكانی ئەمریكا و قەوارەی زایۆنی زیانی گەورەی لە وێستگە ئەتۆمییەكان و كەرەستەكان داوە و لە ئێستادا لە دەرەوەی دەستپێڕاگەیشتنن.

وتیشی: پێویستە سەرەتا قەبارەی زیانەكان هەڵسەنگێنین كە بەر دامەزراوە ئەتۆمیەكان كەوتووە بەر لەوەی گفتوگۆ لە بارەی دانانی چاودێری لەسەریان بكەین.