7 کاتژمێر پێش ئێستا
214 جار خوێنراوەتەوە
هێزێكی سوپای ئـیسرائیل لە غـ.ەززە كەوتنە بۆسەیەكەوە
پەیام
لە شاری غەززە، هێزێكی سوپای قەوارەی زایۆنی دەكەوێتە بۆسەیەكی پتەوەوە، جگە لە كوژراو و بریندار باسیش لە بەدیلگیرانی ژمارەیەكیان دەكرێت.
سەرچاوە عیبرییەكان لە سەرەتای هەواڵەكانی ئەمڕۆیاندا بڵاویان كردەوە: بەرەبەیانی ئەمڕۆ، شەممە سەربازێكی قەوارەكەیان كوژراوە و حەوتی دیكەیش بریندار بوون، ئەوەیش دوای ئەوەی هێزێكی سوپا لە گەڕەكی زەیتوون لە شاری غەززەی باكووری كەرتی غەززە كەوتووەتە بۆسەیەكی پتەوەوە.
هەندێك لە سەرچاوەكانیش ئاماژە بەوە دەكەن "دۆخی بریندارەكان قورسە و ژمارەی كوژراوەكانیش لە سەربازێك زیاترە. هەروەها ئاماژە بەوەیش دەكەن، كە چوار سەربازی دیكە لە میانی ڕووبەڕووبوونەوەكان بێسەروشوێن بوون، ئۆپراسیۆنەكانی گەڕانیش بۆ دۆزینەوەیان بەردەوامی هەیە، بەڵام گومانی ئەوە دەكرێت بەدیل گیرابێتن.
بەپێی زانیارییە سەرەتاییەكان، ئەو هێزەی كەوتوونەتە بۆسەكەی گەڕەكی زەیتوونەوە هێزێكی زایۆنی سەر بە فیرقەی 162ی لیوای 401 بوون و ماڵپەڕی (حدشوت لو تسنزورا)یش دروستبوونی شەڕەتەقە و برینداربوونی لانیكەم نۆ سەربازی پشتڕاست كردووەتەوە.
ماڵپەڕی (حدشوت لڤنی كولام)یش دەڵێت: حەماس هەوڵی بەدیلگرتنی سەربازانی داوە و لێكۆڵینەوەكانیش بەردەوامیان هەیە.
سەرچاوە عیبرییەكان باس لەوە دەكەن سوپای زایۆنی پڕۆتۆكۆڵی هانیباڵی بۆ ڕێگریی لە بەدیلگیرانی سەربازانیان لە ڕووبەڕووبوونەوەكەدا بەكار هێناوە كە تەنانەت ڕێ بە كوشتنی ڕفێنراوەكانیش دەدات.
لەلایەكی دیكەوە و هەر بەپێی زانیاریی میدیای عیبری، بەهۆی تەقینەوەی زرێپۆشێكەوە حەوت سەرباز بریندار بوون كە برینی سیانیان قورسە.
لە تۆڕە کۆمەڵایەتیەکان شەیری بکە