سەرۆككۆماری ئێران: هێندەی ناكۆكییە ناوخۆییەكان لە سزا دەرەكییەكان ناترسم

پەیام 

سەرۆككۆماری ئێران ڕایدەگەیەنێت: هێندەی ناكۆكی و دابەشبوونە نێوخۆییەكان لە گەڕانەوەی سزا و گەمارۆ دەرەكییەكان ناترسێت.

لە میانی دیدارێكیدا لەگەڵ سێ میدیاكار و چالاكی سیاسی وڵاتەكەی، كە شەوی ڕابردوو بڵاوكرایەوە، مەسعود پزیشكیان سەرۆككۆماری ئیسلانیی ئێران باسی گرنگترین پرسە هەنوكەییەكانی ڕۆژ و كاری حكومەتەكەی لە ساڵێكی تەواودا كرد.

لە بەشێك لە وتەكەیدا سەرۆككۆماری ئێران وتی: لەئێستادا ئەو لە گەڕانەوەی سزا و گەمارۆ و هەڕەشە دەرەكییەكان ناترسێت، ئەوەندەی بەشێوەیەكی سەرەكیی لە ناكۆكی و دابەشبوونی نێوخۆیی دەترسێت، كە هەندێكجار لەسەر پرسە ناوەندییەکان سەرهەڵدەدەن.

لەبارەی سزاكانەوە پزیشكیان وتی: نامانەوێت سزاكان بسەپێنرێن، ئەوانەی دەڵێن سزاكان گرنگییان نین، هەڵەن و لەگەڵ واقیعدا یەك ناگرێتەوە، چونكە ئەو گرفتانەی ئەمڕۆ ڕووبەڕوویان بووەتەوە بەشێوەیەكی سەرەكی لە سزاكانەوەیە و بەشێكیش لەوە تێدەگەن.

پزیشكیان وتیشی: هەوڵ بۆ دروستبوونی جەنگ نادەین، بەڵام ئیسڕائیل و ئەمریكا هەوڵ بۆ دابەشكردنی ئێران دەدەن، بەڵام هیچ ئێرانییەك دابەشبوون، یان ڕادەستبوونی زەلیلانەیان ناوێت، ئەگەر هێرشیان بكرێتە سەر بە هێز ڕووبەڕوویان دەبنەوە و لە جەنگ ناترسن.