سبەی پلەكانی گەرما لە بەسڕە و گەرمیان دەگاتە 50 پلەی سیلیزی

پەیام

لە عێراق و هەرێم پلەكانی گەرما بەرز دەبنەوە و لە بەسڕە و گەرمیانیش 50 پلە تۆمار دەكرێت.

كەشناسی عێراق بڵاویكردووەتەوە پلەكانی گەرما لە ڕۆژانی داهاتوودا ڕوو لە بەرزبوونەوەی بەرچاو دەكەن و لە ناوەچەكانی باشوور و ناوەڕاستیش خۆڵبارین دەبێت، دەشلێت سبەی لە بەغداد و دیالە و بابل و كەربەلا و دیوانیە و نەجەف و موسەنا و سەڵاحەدین 48 پلە تۆمار دەكرێت لە واست و میسان و ناسڕیەیش دەكاتە 49 پلە.

هاوكات دوێنێش لە بەسرە پلەی گەرما 48 پلەی تێپەڕاندووە و پێشبینیش دەكرێت سبەی بگاتە 50 پلە.

لە بارەی كوردستانیشەوە كەشناسی هەرێم بڵاویكردووەتەوە سبەی ساماڵ و گەرم دەبێت لە حاجی ئۆمەران 30 پلە و لە هەڵەبجە و سۆران 43 و سلێمانی 44 و دهۆك 45 و  هەولێر و زاخۆ 46  و كەركووك 48 پلە تۆمار دەكرێت لە سنووری ئیدارەی گەرمیانیش 50 پلە تۆمار دەكرێت.