هەسەدە: هەوڵدەدەین لەگەڵ سوپاى سوریا تێکەڵبین، پەیوەندیشمان لەگەڵ توركیا هەیە

پەیام 

ئیلهام ئەحمەد هاوسەرۆكی دەستەی پەیوەندییەكانی دەرەوەی بەڕێوەبەرایەتی خۆسەر لە باكووری ڕۆژهەڵاتی سووریای هێزەكانی هەسەدە ڕایگەیاند: پەیوەندیی ڕاستەخۆیان لەگەڵ توركیادا هەیە، جەختیشی كردەوە ئامانج لێی تەنها هەماهەنگی ئەمنییە، وتیشی: هەوڵی تێكەڵبوون بە سوپای سووریا دەدەن و چەك دانانێن. 
 
ئیلهام ئەحمەد ڕایشیگەیاند: ڕاستەوخۆ لەگەڵ توركیادا لە پەیوەندیداین و تەنیا كەناڵی كراوەمان بۆ هەماهەنگی هەیە، وتیشی: لەپێناو چارەسەركردنی دۆسیە ئەمنییەكاندا، كە بۆ هەردوولا گرنگن، پێویستیمان بە گفتوگۆ و هەماهەنگی فراوانتر لەگەڵ ئەنقەرەدا هەیە. 

ئیلهام ئاماژەی بەوەشدا، هەسەدە لە ئێستادا چاوی لەسەر ڕێڕەوی دانانی چەك نییە، بەڵكو هەوڵی تێكەڵ بوون بە سوپای سووریا دەدەن، كە دەكرێت ببێتە بەشێك لەو ژێرخانەی گرەنتی ئاسایش و ئارامی هەموو سووریا دەكات. 

سەبارەت بە پەیوەندییەكانیش لەگەڵ حكومەتی سووریادا وتی: گفتوگۆكان لەگەڵ دیمەشقدا دانەڕووخاون و پێویستە بەردەوام بن، ئاماژەی بەوەشدا، ئەو جیاوازییانەی لە چاوپێكەتنەكاندا بەدی دەكرێت سروشتییە و هۆكارەكەی بۆ بچڕانی گفتوگۆكان لەنێوان سوورییەكاندا بۆ ماوەی چەندین ساڵ دەگەڕێتەوە.
 
ئیلهام ئەحمەد ڕەتیشی كردەوە، نیەتی جیابوونەوەیان هەبێت، جەختیشی كردەوە، ئیدارەی خۆسەر داوای جیابوونەوە و فیدراڵی ناكات، بەڵكو هەوڵی ئەوە دەدات ئیدارەیەكی نێوخۆیی لامەركەزی هەبێت، كە ڕێگە بە سوورییەكان بدات كاروبارەكانی خۆیان لەچوارچێوەی وڵاتێكدا بەڕێوە ببەن.