چەندین لیژنە راپۆرت لەسەر داهاتی هەرێم و پرسی هەناردەی نەوت ئامادە دەكەن

پەیام 

پەرلەمانتارێكی كوردی ئەنجومەنی نوێنەرانی عێراق رایگەیاند، بۆ پرسی داهاتە نانەوتییەكان و پرسی هەناردەی نەوت لە هەرێم سێ لیژنە دروست دەكرێن و راپۆرتی خۆیان ڕادەستی ئەنجومەنی نوێنەرانی عێراق دەكەن.

سۆران عومەر، ئەندامی ئەنجومەنی نوێنەرانی عێراق رایگەیاندووە، كاری سێ لیژنەكەی ئەنجومەنی نوێنەرانی عێراق بریتی دەبێت لە وردبینیكردن لە داهاتی نانەوتی هەرێم و هەروەها پرسی هەناردەی نەوت و توانای پاڵاوگە نەوتییەكانی هەرێمی كوردستان لەگەڵ ئەوەشدا لیژنەیەكی دیكەش كار لەسەر نرخ و تێچووی بەرهەمهێنانی نەوت لە هەرێم دەكات و دواجاریش لیژنەكان راپۆرتی خۆیان ڕادەستی ئەنجومەنی نوێنەران دەكەن.

ئەو پەرلەمانتارە دەشڵێت، لیژنەكان سەربەخۆیانە كاری خۆیان دەكەن و دەبێت هەردوو حكومەتی ناوەندی و حكومەتی هەرێمیش بەكاری ئەو لیژنانە رازی ببن.

دوای هەشتا رۆژ ئەمڕۆ فەرمانبەرانی هەرێمی كوردستان مووچەی مانگی پێنج وەردەگرن، وەرگرتنی ئەو مووچەیەش پاش چەندین كۆبوونەوەی شاندی نێوان هەرێم و بەغدا بووە لەسەر پرسی داهاتی نانەوتی و پرسی هەناردەی نەوت.