"هەر كەشتییەك بەرەو بەندەرەكانی ئیسرائیل بڕوات بەئامانجی دەگرین"

پەیام 

حووسییەكانی یەمەن ڕایگەیاند، هەڵمەتەكانی لە دژی قەوارەی داگیركەری زایۆنی توندتر دەكاتەوە و، قۆناغی چوارەمی گەمارۆ و هەنگاوەكانی لە دژی زایۆنی دەست پێ دەكات.

بەپێی ئەوەی گرووپە یەمەنییەكە رایگەیاندووە، لەمەودوا تەواوی ئەو كەشتییە بازرگانیانە بە ئامانج دەگرن كە بەرەو بەندەرەكانی قەوارەی داگیركەری زایۆنی دەڕۆن.

حوسییەكانی یەمەن كە تاكە گرووپی چەكدارین لە ئێستادا پشتیوانی لە حەماس دەكەن ڕایانگەیاندووە، قەوارەی زایۆنی پرۆسەی برسیكردنی لە دژی كەرتی غەززە بەڕێوە دەبات، لە بەرامبەر ئەوەدا حوسییەكان هەنگاوە سەربازییەكانیان لە دژی قەوارەی زایۆنی توندتر دەكەنەوە.

حوسییەكان دەڵێن، لەمەودا كەشتی هەر كۆمپانیایەكی بازرگانی بەرەو بەندەرەكانی قەوارەی زایۆنی بڕوات بە ئامانجی دەگرن و ناهێڵن بگاتە شوێنی مەبەستی خۆی.

حوسییەكان داوایان لە تەواوی كۆمپانیا جیهانییەكان كردووە مامەڵە بازرگانییەكانیان لەگەڵ قەوارەی زایۆنی هەڵپەسێرن.