حكومەتی غـ.ەززە: لە سەرەتای جەنگەوە 238 ڕۆژنامەنووس تیرۆر كراون

پەیام 

دوای تیرۆركردنی ڕۆژنامەنووسەكانی جەزیرە، ئاماری رۆژنامەنووسە تیرۆركراوەكانی كەرتی غەززە بۆ 238 ڕۆژنامەنووس بەرز بووەوە.

نیوەڕۆی ئەمڕۆ شەش ڕۆژنامەنووسە تیرۆركراوەكەی ئەمڕۆ لە ڕێوڕەسمێكی جەماوەریدا لە كەرتی غەززە بەخاك سپێردران. نووسینگەی ڕاگەیاندنی حكوومەتی غەززە ڕایگەیاند، ژمارەی ئەو ڕۆژنامەنووسانەی كە لە 7ی تشرینی یەكەمی ساڵی 2023وە تا ئێستا لە ئاكامی هێرش و بۆردومانەكانی سوپای داگیركەری زایۆنیدا بۆ سەر كەرتی غەززە كوژراون، بەرزبووەوە بۆ 238 ڕۆژنامەنووس.

هەروەها بزووتنەوەی دەستپێشخەری نیشتمانیی فەڵەستینی داوای كرد كە قەوارەی زایۆنی لەسەر كوشتنی شەش ڕۆژنامەنووس لە شاری غەززە، سزا بدرێت و ڕایگەیاند: ئامانجی سوپای داگیركەر ئەوەیە، ڕێگریی بكات لە گەیاندنی وێنەی تاوانە دڕندەكانی لە غەززە بۆ جیهان.

ڕێكخراوی پەیامنێرانی بێسنووریش سەركۆنەی ئەوەی كرد كە كۆمەڵگەی نێودەوڵەتی ئەو هۆشدارییانەیان پشتگوێخست كە لەبارەی بەئامانجگرتنی ڕۆژنامەنوسانەوە دابوویان. ڕاشیگەیاند: داوا لە ئەنجوومەنی ئاسایش دەكەین كۆببێتەوە ڕێكاری یەكلاكەرەوە بگرنە بەر بۆ پرۆسەی لەسێدارەدان و كوشتنی ڕۆژنامەنوسان لەلایەن ئیسرائیلەوە.