15 کاتژمێر پێش ئێستا
86 جار خوێنراوەتەوە
سووریا.. دەستەیەكی نیشتیمانی بۆ قۆناغی راگوزەر پێكهێنرا
پەیام
بە بڕیاری سەرۆككۆماری سوریا دەستەی نیشتمانیی بۆ دادپەروەریی قۆناغی ڕاگوزەر پێك هێنرا.
ئەو دەستەیەی ئەحمەد شەرع، سەرۆككۆماری سووریا پێكیهێناوە لە 12 ئەندام پێكدێت و ناوی "دەستەی نیشتمانی بۆ دادپەروەری قۆناغی ڕاگوزەریی"یە، كاری دەستەكەش بریتی دەبێت لە بەدواداچوون بۆ پێشێلكارییەكانی رژێمی پێشوو، هەروەها قەرەبووكردنەوەی زیانلێكەوتووان.
لە دەقی بڕیارەكەی سەرۆكایەتی كۆماری سوریا بۆ پێكهێنانی دەستەكەدا هاتووە: "بە پشتبەستن بە بڕگە و ئەحكامەكانی ڕاگەیاندنی دەستووری و بەپێی بڕیاری ژمارە 20ی ساڵی 2025 "دەستەی نیشتمانی بۆ دادپەروەریی ڕاگوزەری" پێكهێنرا، دەستەكەش لە سەرۆك و 12 ئەندام كە یەكێكیان دەبێتە جێگری سەرۆكی دەستە، پێك دێت.
هەروەها ڕاشگەیەنراوە ئەندامانی "دەستەی نیشتمانی بۆ دادپەروەریی ڕاگوزەریی" دەستبەجێ و پاش گەیشتنی مەڕسوومی سەرۆكایەتی دەست بە ئەركەكانیان دەكەن و دابەشكردنی ئەركەكانیش بەپێی پەیڕەوی نێوخۆیی دەستەكە دەبێت. ئاماژە بەوەش كراوە، كە بڕیارەكە لە ڕۆژی دەرچوونییەوە كاری پێ دەكرێت.
لە 18ی ئایاری ڕابردوودا، سەرۆكی سووریا بڕیارێكی بۆ پێكهێنانی دەستەیەكی دادپەروەریی دەركرد، كە ئەركی ئاشكراكردنی ڕاستییەكانی تایبەت بە پێشێلكارییەكانی ڕژێمی بەعسی ڕووخاو و لێپێچینەوە لە بەرپرسانی ئەو پێشێلكارییانە و قەرەبووكردنەوەی زیانلێكەوتووان، دەبێت.
لە تۆڕە کۆمەڵایەتیەکان شەیری بکە