14 کاتژمێر پێش ئێستا
116 جار خوێنراوەتەوە
سەرۆككۆماری ئێران: حەزمان لە جەنگ نییە، بەڵام وەڵامی هەر دوژمنكارییەك دەدەینەوە
پەیام
سەرۆككۆماری ئێران دەڵێت: ئێران حەزی لە جەنگ نیە بەڵام وەڵامی هەر دوژمنكارییەك بۆ سەر وڵاتەكەمان دەدەینەوە. هاوكات ئەنجومەنی شورای ئەو وڵاتەش گفتوگۆ لەسەر كشانەوە لە پەیماننامەی ئەتۆمی دەكات.
مەسعود پزیشكیان، سەرۆكی ئێران، ڕایگەیاند، ویلایەتە یەكگرتووەكانی ئەمریكا و وڵاتانی ڕۆژئاوا فشار دەخەنە سەر تاران بۆ ئەوەی "بیكەنە وڵاتێكی لاواز و بێ چەك"، "بەڵام ئێمە لە هیچ هەڕەشەیەك ناترسین و وڵاتەكەمان بە هەموو توانایەوە كار دەكات".
سەرۆكی ئێران ئاماژەی بەوە دا، "چەندین دەیەیە بە پیلانگێڕی و فیتنە ئێران دەكەنە ئامانج، بەڵام ئێستا زیاتر بوونەتەوە"، و وتیشی: ئەو وڵاتانەی بانگەشەی دیموكراسی دەكەن، ئێران بە تێكدانی سەقامگیری ناوچەكە تۆمەتبار دەكەن، لە كاتێكدا چاوپۆشی لە تاوانەكانی قەوارەیەكی تیرۆریستی دەكەن كە لە ناوچەكەدا خەڵك دەكوژێت و تیرۆر پەیڕەو دەكات.
لەلایەكی دیكەوە، حسێن عەلی حاجی دەلیگانی، جێگری سەرۆكی لیژنەی ماددەی 90 لە پەرلەمانی ئێران، ڕایگەیاند: ئەنجومەنی شوورا (پەڕلەمان) ئامادەیە بۆ دەستپێكردنی داڕشتنی پڕۆژەیاسایەكی بەپەلە كە بڕیار بە كشانەوەی ئێران لە پەیماننامەی قەدەغەكردنی بڵاوبوونەوەی چەكی ئەتۆمی دەدات.
دەلیگانی لە لێدوانێكیدا بۆ كەناڵی "فۆكس نیوز"ی ئەمریكی، ئەمڕۆ هەینی، ڕایگەیاند: پەڕلەمان هەفتەی داهاتوو دەست بە گفتوگۆكردن لەسەر پڕۆژەیاساكە دەكات دوای تەواوكردنی ڕێڕەوی یاسایی خۆی.
ئەم بەرپرسەی پەڕلەمانی ئێران ئاماژەی بەوەش دا، كشانەوە لە پەیماننامەكە سادەترین وەڵامە لەلایەن تارانەوە، بۆ ئەو وڵاتانەی ئەورووپا، كە سزایان بەسەر تاراندا سەپاندوەتەوە.
لە تۆڕە کۆمەڵایەتیەکان شەیری بکە