ئیسرائیل بۆردومانی یەمەنی كرد و دەنگۆی بەئامانجگرتنی سەركردەیەكی باڵا هەیە

پەیام 

قەوارەی زایۆنی بۆردومانی یەمەنی كرد و چەند سەرچاوەیەكیش دەنگۆی بە ئامانجگرتنی سەرۆكی حكومەتی ئەنساروڵڵایان بڵاو كردوەتەوە، لە كاتێكدا سەرچاوە فەرمییەكانی گروپەكە كوژرانی سەركردەكانیان ڕەت دەكەنەوە.

ئاژانسەكانی "نۆڤۆستی" و "سپۆتنیگ"ی ڕووسی، لە سەرچاوەیەكی بنەماڵەكەیەوە گواستیانەوە، كە ئەحمەد غالیب ڕەهوی، سەرۆكی حكومەتی حووسییەكانی یەمەن "ئەنساروڵڵا" لە بۆردوومانێكی فڕۆكە جەنگییەكانی قەوارەی زایۆنیدا لە چەند كاتژمێری ڕابردوو لە ماڵێكدا لە ناوچەی حەدە لە باشووری سەنعا كوژراوە.

بەپێی ئەوەی ئاژانسە ڕووسییەكان بڵاویان كردوەتەوە "هێرشەكە چوار كوژراوی لێ كەوتووەتەوە، لەنێویاندا ڕەهوی و ژمارەیەك لە پاسەوانەكانی، چەند كەسێكی دیكەیش بریندار بوون.

سەرچاوەكە ئاماژەی بەوەش كردووە گروپەكە "ئامادەكاری دەكات بۆ ڕاگەیاندنی هەواڵی كوژرانی ڕەهوی"، ئەمەش دوای هەڵبژاردنی سەرۆكوەزیرانێكی نوێ بۆ حكومەت، وەك جێگرەوەیەك بۆ رەهەوی كە ماوەی ساڵێك لە پۆستەكەیدا بووە.

لە بەرانبەردا، "حووسییەكان"  هەواڵی كوژرانی سەرۆكوەزیران ڕەهەوییان ڕەت كردەوە و تەنها ئەوەیان پشتڕاست كردوەتەوە كە قەوارەی داگیركەری زایۆنی چەند پێگەیەكیان لە یەمەن بۆردومان كردووە، لای خۆیشیەوە قەوارەی زایۆنی ڕایگەیاند: لە هێرشەكەدا ژمارەیەك سەركردەی باڵای حوسییەكانمان بەئامانج گرتووە.