پێش 2 هەفتە
241 جار خوێنراوەتەوە
ناوه‌ڕۆكی ئه‌و پێشنیازه‌ی كه له‌سه‌ر مێزی گفتوگۆیه و جه‌نگ و گه‌مارۆ ڕاده‌گرێت
په‌یام
میدیاكانی فه‌ڵه‌ستین ئاشكرایان كرد، تره‌مپ ڕێككه‌وتنێك بۆ كۆتاییهێنان به جه‌نگی سه‌ر غه‌ززه ڕاده‌گه‌یه‌نێت، سوپای زایۆنی ده‌كشێته‌وه و له‌بری ئه‌و سوپا عه‌ره‌بیه‌كان له غه‌ززه جێگیر ده‌بن.
ئاژانسی هه‌واڵی (مه‌عن)ی فه‌له‌ستینی به پشتبه‌ستن به سه‌رچاوه‌یه‌كی تایبه‌ت بڵاویكرده‌وه، دۆناڵد تره‌مپ، سه‌رۆكی ئه‌مریكا ڕێككه‌وتنێكی هه‌مه‌لایه‌نه بۆ كۆتاییهێنان به شه‌ڕی غه‌ززه ڕاده‌گه‌یه‌نێت، له‌وانه كشانه‌وه‌ی سوپای زایۆنی و هاتنه ناوه‌وه‌ی سوپا عه‌ره‌بییه‌كان، به‌تایبه‌ت سوپای میسر.
هاوكات هه‌ر ئه‌مڕۆ ڕۆژنامه‌ی یه‌دیعۆت ئه‌حرانۆت كه میدیایه‌كی زایۆنییه ئاماژه‌ی به‌وه كرد، دوای چه‌ندین مانگ له گفتوگۆی نهێنی ئه‌گه‌ری هه‌یه سه‌میر حه‌لیله بازرگانی فه‌ڵه‌ستینی وه‌ك پارێزگاری غه‌ززه ده‌ستنیشان بكرێت.
ڕۆژنامه‌كه له زاری چه‌ند سه‌رچاوه‌یه‌كه‌وه ڕایگه‌یاندووه، بابه‌ته‌كه په‌یوه‌ندی به هه‌وڵێكه‌وه هه‌یه بۆ هێنانی كه‌سێك بۆ ناو كه‌رتی غه‌ززه كه له‌ژێر چاودێری كۆمكاری عه‌ره‌بیدا كار بكات، له‌لای قه‌واره‌ی زایۆنی و ئه‌مریكا په‌سه‌ند كراوه.
باسی له‌وه‌ش كردووه، پیاوێكی ئیسرائیلی به ناوی (ئاری بن مێناشێ) له كه‌نه‌دا لۆبی بۆ حه‌لیلا كردووه تاوه‌كو ئه‌و پۆسته وه‌ربگرێت، هاوكات ئه‌م پرسه له چه‌ند هه‌فته‌ی ڕابردوودا خێراتر بووه به‌هۆی كۆبوونه‌وه‌كان به سه‌رۆكایه‌تی ئه‌مریكا و په‌یوه‌ندییه‌كانی حه‌لیله له قاهیره.
حه‌لیله بازرگانێكی فه‌له‌ستینییه، تا مانگی ئاداری ساڵی ڕابردوو وه‌كو سكرتێری گشتی حكومه‌تی (ئه‌حمه‌د قه‌ریع) سێیه‌م و سه‌رۆكی ده‌سته‌ی به‌ڕێوه‌به‌ری بۆرسه‌ی دراوی كاغه‌زی فه‌له‌ستین كاری كردووه.
لە تۆڕە کۆمەڵایەتیەکان شەیری بکە