دادگای فیدڕاڵی سكاڵایەكی دژ بە گرانیی نرخی كارەبای 24 كاتژمێری ڕەت كردەوە

پەیام

دادگای فیدڕاڵی سكاڵای پەڕلەمانتاری پێشووی كۆمەڵی دادگەری لەسەر گرانی نرخی كارەبای 24 كاتژمێری لە هەرێمی كوردستان بە پاساوی ئەوەی تایبەتمەندی ئەوان نییە، ڕەت كردەوە.

عومەر گوڵپی: بەردەوام دەبین لە دژایەتیكردنی گرانی نرخی كارەبا

لەوبارەیەوە سكاڵاكار ڕایدەگەیەنێت: لە داهاتووشدا بەردەوام دەبن لە دژایەتی ئەو ستەمەی لە خەڵك دەكرێت و كەمتەرخەمی ناكەن.

سەرۆكی نوێی دادگای فیدڕاڵی تائێستا هیچ سكاڵایەكی بە بەرژەوەندی سكاڵاكار بڕیار لێ نەداوە

 بەپێی بەدواداچوونێكی پەیام بۆ دانیشتنەكانی دادگا لە ماڵپەڕی دادگاكە، لەو كاتەوەی سەرۆكی نوێی دادگای فیدڕاڵی لە سێی مانگی ڕابردووەوە دەست بەكار بووە و لە هەشتی ئەو مانگەوە دانیشتنی دادبینی ئەنجام داوە، هیچ سكاڵایەكی بە بەرژەوەندی سكاڵاكەر بڕیار لێ نەداوە، تا ئەمڕۆ لە كۆی 35 سكاڵا 28یانی بە پاساوی "نەبوونی تایبەتمەندی" ڕەت كردووەتەوە و حەوتیشیان، یان بڕیاری پووچبوونی لێ داون، یان دوای خستوون بۆ كاتێكی دیكە.